Vawiin (July 28, 2022) khan Devotion Room, Synod Office-ah Synod Moderator kal chhuakte thuchah (Synod Moderators’ Valedictory Sermon) revised & enlarged chu Synod Moderator Rev. Dr. Vanlalnghaka Ralte chuan Pathian hnenah hlanin a tlangzarh.
Synod Literature & Publication Board (SL&PB) hian kum 1981 khan 1933-1980 inkar a mi zawng a lo ti chhuak tawh a, kum 40 hnuah 1933-2020 thleng hi lakhawmin chhuah that leh ni se, ti a an rel angin tih chhuah a lo ni leh ta a ni.
He lehkhabuah hian Assembly tih a nih lai atanga Synod tih hnua Moderator lo ni tawh mi 79 te thuchah chhiar tur a awm a, Moderator-te hian a hun lai kohhran mil zela thuchah an sawi bakah kohhran hrang hrang an tlawh chanchin atanga kohhran dinhmun thui tak hriat theihna tur lehkhabu tangkai tak leh chhiar manhla tak tur a ni. Kum 1933-2020 inkarah hian kim lo 9 (hmuh zawh tawh loh-1935, 1936, 1937, 1941, 1943, 1945, 1950, 1957, 1964) a awm. Kum 1933 hmalam a mi erawh ziaka dah a awm loh avangin hmuh mai tur a awm tawh lo a ni.
Moderator kal chhuak thuchah hi mi 63 in an sawi a, Moderator-a tang nawn mi sawm (10) an awm bawk.
Moderator Valedictory Sermon hi kum 1957 thleng khan Moderator inthlak dawnah rorelna hmunah an sawi thin a, kum 1958 atangin Pathianni zanah an sawi tan a ni.
Synod Moderator kal chhuakte thuchah (Synod Moderators’ Valedictory Sermon) hi Rs. 350/- man tur a ni a, Synod Bookroom Headquarters leh Synod Bookroom Branch hrang hrangah lei theihin a awm ang.
For more Pics Click Here