Zanin (July 29, 2022) khan Synod Worship Committee buatsaih Residential Choir Conductors’ Training vawi 26-na, Pi Zaii Hall, Synod Conference Centre-ah kharna hun hman a ni.
Synod Secretary Rev. Z.D. Lalhmachhuana’n training kharna hun hi a kaihruai a, Upa H. Lalhmingmawia, Co-ordinator, Synod Worship chuan report a pe a, Rev. Dr. K. Lallawmzuala, Executive Secretary i/c Worship in thusawiin training chhuakte hnenah certificate a hlan a ni. Nl. Melody Lalzirliani’n Pathian fakna hla a sa a, trainee aiawh thusawi ngaihthlak a ni a, Senior Music Instructor Pu H. Lalrinmawia'n lawmthu a sawi zawhah Upa C. Vanlalvuana, Worship Executive Committee Member-in lawmthu sawi tawngtaina hun a hmang.
Tun tum Zaipawl Conductor training-ah hian mi 74 an rawn tel thei a, Kohhran pawl dang - IKK, BCM, ICI leh Presbyterian Church of Myanmar atangin mi 5 an tel bawk. Training chhung hian zaipawl rawngbawlna tana thil pawimawh hrang hrang - Musical Terms & Signs, Conducting, Harmonisation, Scales leh thil chi hrang hrang te Worship Department-a Music Instructor ten an zirtir a ni.
Synod Worship Committee chuan Zaipawl Conductor Training hi kum 1995 atang khan kum tinin a buatsaih thin a. Zaipawl Conductor Training-a zir chhuak hi mi 990 an awm tawh a, kumina trainee mi 74 nen chuan mi 1064 an tling ta a ni.