July 30, 2022 (Inrinni) chhun dar 12:00 khan Assam Mission Field Church Court chu Synod Moderator Rev. Dr. Vanlalnghaka Ralte chuan Satribari Church, Guwahati, Assam-ah a hawng.
Synod Moderator hi Rev. H. Remthanga, Executive Member, PCI leh Rev. R. Lalhmingsanga Secretary, Synod Mission Board ten an tawiawm a ni.
Church Court hawnna inkhawm hi Synod Moderator-in kaihruaiin Field Secretary Rev. Billy H. Lalrinchhana hnen atangin Field chanchin tlangpui ngaihthlak a ni a, Synod Mission Board Secretary Rev. R. Lalhmingsanga hnen atangin Church Court chungchanga hriat tur pawimawhte leh inhrilhfiah ngaite ngaihthlak a ni. Synod Moderator hnen atangin thuchah ngaihthlak a ni a, Zaipawl Pahnih - Satribari (Guawhati) Kohhran Zaipawl leh Dibrugarh Bial Zaipawl zai ngaihthlak a ni a, Rev. H.Remthanga’n malsawmna sawiin a tin a ni.
Inkhawm ban hian Field Office kawtah Synod Moderator Rev. Dr. Vanlalnghaka Ralte-in Monument a hawng zui a, hemi zawh hian Church Court hawn lawmna ruai an kilho nghal a ni.
He hun hmang tur hian Field chhung hmun hrang hranga thawktu leh kohhran member-te mi 900 bawr vel an kal khawm thei a, thawktute pawh damlohna leh harsatna bik nei mi tlemte tih loh chu an kal kim thei vek a ni.
Assam Mission Field hi March 12, 2008 khan Guwahati Mizo Kohhran Biak Inah Rev. Zosangliana Colney, Executive Secretary-in a lo hawng tawh a, a kum 14 naah Church Court hawn a ni ta hi Field tan leh Kohhran tan mellung pawimawh tak a ni. Tun dinhmunah Pastor bial 4 awmin Kohhran chhungkua In 493, Kohhran member 1448, Presbyterian Kohhran hlang awmna chhungkua 340 leh in awm pawlhna chhungkua 153 an awm mek a ni.
July 29, 2022 (Zirtawpni) zan khan Satribari Kohhran Biak Inah Puipate leh thawktuten inkawmkhawmna neiin zawhna leh chhanna hun hlawk tak an hmang ho thei bawk.