Family Guidance & Counselling Centre (FG&CC)-in August 11, 2022 atanga Church Leaders' Intensive Residential Pastoral Care & Counselling Training vawi 35-na, Synod Conference Centre-a a buatsaih chu August 22, 2022 (Thawhtan) zan khan ‘Final Evaluation & Graduation Service’ neiin khar a ni.
He Counselling Training-ah hian Aizawl khawpui chhunga Pastor Bial 9 atangin Kohhran aiawh mi 26 an tel a ni.
Training kharna inkhawm hi Rev. Lalsangbera, Director, FG&CC-in a kaihhruai a, He hun hmanpuitu Rev. V.L. Luaia Hranleh, Executive Secretary i/c FG&CC chuan Training chhuakte hnenah Certificate semin thuchah a sawi a. "Lal Isuan a zirtirte hnenah, 'Nangmahnin ei tur pe rawh u' a tih ang khan, kan bul hnaia awm harsatna tawk leh min mamawhtute hnenah ei tur kan pek a ngai a ni" tiin, training chhuakte chuan an thil zirte chu midang te tana tangkai taka hmang turin a fuih.
Training kharna inkhawmah hian training chhuakte chuan an hlawkpui dan a lema an ziak chu entirin an hrilhfiah a, T.Upa H. Lalthansanga, Chhinga Veng East chuan training chhuakte aiawhin thu a sawi a. Upa Lalbiakmawia Khiangte, Com. Member, FG&CC-in Training chhuakte a tawngtaisak a ni.
FG&CC hian Church Leader pual hian kum 2002 atang khan Training a buatsaih thin a, Kohhran hruaitu mi 781 training chhuak an awm tawh a ni.
Synod hian Counselling Centre pakua - Mission Veng, Bawngkawn, Vaivakawn, Champhai, Serchhip, Kolasib, Lunglei, Mamit leh Khawzawlah te a nei a. Heng Counselling Centre pakuaah hian tun thlenga pantu (Client) an neih tawh zat chu mi 46,694 niin, kumin 2022 bika pantu awm tawh zat chu mi 4,827 an ni.