Synod Information and Publicity Department (Synfo) leh Central Kristian Thalai Pawl (CKTP) thawkdunin Branch KTP malzai intihsiakna ‘Praise On Solo Competition 2022’ an buatsaih leh dawn. He intihsiakna hi Mizoram pum huap a ni dawn a, Presbyterian Kohhran, KTP member-te tan tel theih a ni ang.
Kum 2016 khan Praise On Solo Competition hi hlawhtling taka buatsaih tan a ni. Mahse, hemi hnu hian mal zai anga intihsiakna chu neih chhunzawm a nih loh hnuah, kumin hian buatsaih a ni leh dawn a. He intihsiaknaa tel duh tan August 30, 2022 thleng hming theh luh theih a ni.
Kumin Praise On Solo Competition ah hian lawmma atan pakhatna Rs. 1,00,000; Pahnihna Rs. 50,000; Pathumna Rs. 30,000 leh Consolation Prize (Top Ten tling chin) Rs. 7,000 hlan an ni ang.
Branch KTP malzai intihsiakna hi Aizawl khaw pawn hmun panga leh Aizawl chhung hmun hnihah September 26 atanga nei tanin, October 6, 2022 chhungin Elimination Round neih tur a ruahman a ni.
Aizawl khaw pawnah Kolasib Diakkawn Kohhran-ah bul tan a ni dawn a, a tuk September 27-ah Lunglei Chanmari Kohhran-ah; September 28 khian Mamit Kohhranah; September 29-ah Serchhip Kawnpui Kohhran-ah neih a nih hnuah Champhai Vengthlang Kohhran-ah September 30-ah neih a ni leh ang.
Aizawl chhungah Aizawl chhim lam tan October 3-4, 2022 hian Tuikhuahtlang Kohhran-ah neih a ni anga, Aizawl North lam tan October 5 leh 6, 2022 hian Ramhlun Vengchhak Kohhran-ah neih a ni ve thung ang.
October 12-13, 2022 hian Second Round hi Synfo Studio leh Mission veng Kohhranah neih a ni dawn a, result hi October 13, 2022-ah puan a ni ang.
Top 50 intihsiakna hi ni thum chhung – October 18, 20, leh 21, 2022-ah Republic Veng Kohhranah neih tur niin, intihsiakna neih zawhah result puan nghal a ni ang.
October 27 leh 28, 2022 hian Top 20 intihsiakna hi Chaltlang Kohhran-ah nghah niin, intihsiak zawhna result puan nghal tura ruahman a ni.
Top 10 thlan chhuah tur niin hei hi Final Round a ni nghal dawn a, heta tang hian pakhatna, pahnihna leh pathumna thlan chhuah an ni ang. He round hi November 8 leh 17 khian Mission Vengthlang Kohhranah neih tura ruahman niin, November 18, 2022 khian ‘Praise On Solo Competition’-a pakhatna chu tunge a nih a hriat tawh dawn a ni.
Kumin Branch KTP mal zai intihsiakah hian Upa C.Vanlalvuana, Chanmari; Upa Zothanmawia, Khatla leh Stacy VL Muanpuii, Tuikual te’n judge hna an thawk dawn a ni.