Vawiin (Aug. 25, 2022) khan Presbyterian Bible School (PBS) chuan Batch 52-na pualin Farewell and Dedication Programme Mission Veng Kohhran Hall, Mission Vengah an hmang.
Programme hi Rev. Lalrinsanga, Principal-in a kaihruai a, Rev. Ramngaihawma Khiangte, PBS Zirtirtu-in inlawmna leh inhmelhriattirna hun a hmang a. PBS Zirtirtu Rev. Lalengzika’n report a pe a, Synod Statistician Rev. Lalsangbera’n zirchhuakte hnenah certificate a hlan.
Rev. Dr. C. Lalhlira, Ex-Moderator-in zirlaite hlanna neiin thuchah a sawi a, zirlai exam-a titha te leh class kal kimte hnenah Rev. P.B. Mankima, PBS Committee member-in lawmman a hlan a, Pu C. Awithanga Award chu Rev. Lalthlengliana, PBS Committee member-in a hlan bawk. Upa C. Roenga, PBS Committee Member-in zirlaite tana tawngtaisakna a nei a. Rev. T. Thuamliana, PBS Zirtirtuin lawmthu sawina hun a hmang a, Chairman-in malsawmnain programme a khar a ni.
PBS-ah hian a din tirh atangin tun thleng hian zirlai 2518 an awm tawh a, chung zinga 2130 ten tha takin an passed a ni. Tuna batch 52-naah hian zirlai 39 awmin zirlai 32 ten tha takin an pass a, exam lo 7 an awm a ni. Exam-a titha zual pathumna thlengin lawmman Rs.1000/-, Rs.700/-, Rs.500/- leh lawmpuina thuziak PBS Committee hminga hlan an ni a, chungte chu:-
1st – Zorinpuia s/o Lalbiaksanga, Chawnpui Kohhran
2nd – PC. Lalmalsawmi d/o PC. Lalvensanga, Bawngkawn Kohhran
3rd – Robert Rosangpuia s/o R. Liankunga, Thenzawl Vengthlang Kohhran te an ni.
Batch 52-na zirlai zingah hian class kal kim mi 2 an awm a, lawmman Rs. 500/- ve ve hlan a ni.
Kum 2014 atangin zirlai zinga Christian Theology leh Church Administration & PCI Constitution Subject-a titha ber hnenah Pu C. Awithanga Award hlan thin a ni a, award hian pawisa fai Rs.1,000/- a keng tel a ni. Tun tumah hian Zorinpuia’n Christian Theology-ah 92% leh Church Administration & PCI Constitution-ah 95% hmuin titha ber nihna a hauh a ni.