Vawiin (Sept. 11, 2022) hi Naupang Sunday School Inkhawmpui Ni a ni a, Hripui leng avanga kum 2 ngawt mai Naupang Inkhawmpui neih theih a nih loh hnuah Bial leh Kohhran hrang hrangah Naupang Inkhawmpui hi hman a ni ang.
Naupang Inkhawmpuiah hian Sunday School naupangte chu Pathian thu, hla leh thu inchhang hmangin inelna neih a ni ang a. Heng bakah hian naupangten item hrang hrang a remchan dan angin an nei bawk ang. Naupang Inkhawmpui hi Bial tam zawk chuan intihsiakna atan an hmang a, Bial thenkhat erawh chuan intihsiak lovin an hmang thung.
Naupang Inkhawmpui hi atirah chuan Missionary-te thahnemngaihna avanga neih tan a ni a. Kum 1931 khan Aizawl Tlangnuam Kohhranah neih a ni a, hei hi Naupang Inkhawmpui hmasa ber ni-a hriat a ni.
Tun hma lam chuan Naupang Inkhawmpui hi Bial hrang hrangin an remchan hunah an nei mai thin a, Bial tinte kan kal rual theih nan MSSU chuan Sunday School Zirlai Syllabus-ah Naupang leh Senior Inkhawmpui hun tur an ruahman tel ta a ni.
MSSU hnuaiah hian Kum 2021 Synod Inkhawmpui report-a a lan danin Sunday School 1032 a awm mek a. Tun Pathiannia Inkhawmpui nei tur Beginner dept. - Sacrament dept.-ah hian zirlai 99,136 leh zirtirtu 21,000 an awm mek a ni.