Synod Higher Secondary School chuan an kum 60 tlin (Diamond Jubilee) pualin September 15-16, 2022 khan School NSS Unit bul tumin an Multipurpose Hall-ah thisen an pe. Thisen hi Unit 207 lai an pe thei a, thisen petute hi mipa 166 leh hmeichhia 41 an ni.
Diamond Jubilee puala thisen pek buatsaihah hian tuna zirlai leh thawktu ni mekte bakah zirlai hlui eng emaw zatin thisen an pe a, Mizoram State-a NSS hotu ber Dr. Zirlianngura, SNO pawhin School hming hian thisen a pe ve bawk.
Synod HSS hian thisen mamawh ngawih ngawihte tana a thlawna thisen pek hi an ngai pawimawh hle a, April 2020 - March 2021 academic session chhung khan unit 121 pein HSS category-ah AVBD chuan thisen pe hnem ber (First Prize)-ah puangin thuziak mawi tak a lo hlan tawh a; April 2021 - March 2022 academic session-ah unit 104 pein AVBD chuan thisen pe hnem ber (First Prize)-ah puang lehin thuziak mawi tak a hlan leh bawk a ni.
April 2020 - March 2021 academic session chhung hian Sports Minister's Trophy for voluntary Blood Donation First Prize dawngin thuziak mawi tak leh Rs.50,000/- hlan an ni a. April 2021 - March 2022 academic session-ah Sport's Minister Trophy First Prize dawng tura thlan an ni leh bawk.
Sports Minister Trophy hi NSS Day (Sept 23, 2022) hian Vanapa Hall-ah sem tur a ni. NSS Day hi Aizawlah chuan HSS leh College ten Vanapa Hall-ah lawm tur a ni a, college leh HSS atangin volunteer thlan bik leh NSS P.O te, Sorkar official te an tel ang.
