Nimin (Sept. 21, 2022) chawhnu dar 1:30 khan Synod Rescue Home Day vawi 35-na lawmna programme chu Synod Rescue Home Chapel-ah neih a ni.
Home Day lawmna programme hi Rescue Home Director Rev. Lallianmawia Pachuau-in a kaihruai a, report pahnih Pu R. Lalnuntluanga, Synod Social Front Coordinator leh Pi K.C Lalchhandami, Social Worker te hnen atangin ngaihthlak a ni a, Rev. C. Zorammawia, Senior Executive Secretary-in Home Day Address a sawi a, mi 2 Pu Lalawmpuia leh Nl. Lydia VL Nunmawii te hnen atangin Testimony ropui tak ngaihthlak a ni bawk. He hunah hian Rescue Home Zaipawl, Nl. H. Lalremruati leh One in Christ te hnen atangin Pathian fakna hla ngaihthlak a ni a, Rev. J.H Zaikima, Leitan Bialtu Pastor-in malsawmnain a tin a ni.
Tunah hian thawktu 29 awmin damlo 54 (Mipa 49 leh hmeichhia 5) an awm mek a. Damlo admit tawh zawng zawng hi 6464 an ni. September 2021 - September 2022 chhung khan mimal, Pawl leh Kohhran atangin tanpuina sumfai leh thilpek chi hrang hrang thahnem tak an dawng bawk.
