September 23, 2022 zan khan Synod Multipurpose Training Centre buatsaih Lay Leaders’ Residential Training vawi 216-na kharna leh Graduation chu SMTC Hall-ah neih a ni.
Training kharna inkhawm leh Graduation Programme hi Rev. Lalrinthara, Programme Director-in a kaihruai a, Upa B. Lalhmunliana, Synod Secretary (Jr.) chuan kharna thuchah sawiin trainee-te hnenah Certificate hlanna a nei a. Trainee-te tana tawngtaisakna leh lawmthu sawina hun Rev. T.C. Laltlanzova’n a hmang a, trainees aiawhin Upa R. Lianthanga, New Chalrang Kohhran hnen atangin lawmthu sawina ngaihthlak a ni a, Pi L. Vanlallawmi’n hla 2 sain zaia rawngbawlna hun a hmang bawk.
Tun tumah hian Presbytery 9 - Teirei, Lunglei East, Kolasib, Lunglei West, Tlawng, Tuichangral North, Tawi, Khawthlang leh Chhimtuipui Presbytery atangin Kohhran Upa 33 an tel thei a ni. Training-ah hian Resource person, Rev. Vanlalzuata, Rev. T.C. Laltlanzova, Rev. F. Lalrinnunga leh Rev. Lalrinthara ten class an neihpui thin a, Synod Office Finance Manager Upa Lalsawmliana’n Sum Vawn Dan chungchang a zirpui bawk. Training chhung hian trainee hote hian SMTC hmunah an riahchilh vek a ni.
Synod Multipurpose Training Centre hi kum 1996-a hawn a ni a, a hawn kum atangin Lay Leaders’ Training - Kohhran Upate puala training hi neih chhoh tan nghal a ni. Tun thleng hian training hi vawi 216 neih tawh a ni a, Kohhran Upa training nei tawh zawng zawng hi mi 7041 an ni.
SMTC-ah hian kum tluanin training programme chi hnih - Ministerial leh Vocational training kalpui a ni a. Kohhran tihnghehna leh tihhmasawn zelna tur Synod hnuaia Department hrang hrangin Training a buatsaih thinte hi SMTC-ah hian a remchan dan angin neih thin a ni. Vocational training hnuaiah hian trade chi hrang hrang - Tailoring, Diploma in Computer Application (DCA), Mobile Repairing, Beauty Culture te kalpui mek a ni a, January, 2023 atangin trade 2 - Welding & Fabrication leh Electric Wiring & Repairing hawn thar tur a ni bawk.