October 1, 2022 khan Synod Bookroom Hnahthial Branch chu Rev. V.L. Luaia Hranleh, Executive Secretary i/c PRESCOM, Mizoram Synod chuan Pathian hnenah hlanin a hawng.
Hnahthial Branch thar hawn inkhawm hi Hnahthial Presbyterian Kohhran Hall-ah hman niin Upa H. Ronghaka, General Manager, PRESCOM chuan inkhawm a kaihruai a, Rev. V. Lalzarliana, Chairman, Hnahthial Kohhran Joint Committee-in tawngtaia inkhawm a hlan hnuin Branch thar din tura hmalak chhoh a nih dan Pu Lalniliana, Manager, Synod Bookroom hnen atangin ngaihthlak a ni a. Hemi hnu hian Synod Bookroom Hnahthial Branch thar chu Synod Bookroom Branch puitling 16-na ni turin Rev. V.L. Luaia Hranleh, Executive Secretary, i/c PRESCOM etc, Mizoram Synod chuan a hawng zui ta a ni.
Branch thar hawn hnu hian Hnahthial Pastor Bial Zaipawl zaiin Rev. Lalawmpuia, Chairman Synod Bookroom Hnahthial Branch Committee leh kalkhawmte atangin thusawi ngaihthlak zui a ni a, Zoremi Ralte hnen atangin Pathian fakna hla vawi hnih ngaihthlak a ni bawk. Rev. K. Lalpiangthara, PRESCOM Board member-in lawmthu sawiin Rev. Lallianzara, Administrative Secy, Chhim Bial chuan malsawmnain a tin a ni.
Synod Bookroom Hnahthial Branch thar hawn a nih hnu hian Synod Bookroom dawr leh stockroom atana In lei thar, Hnahthial Bazar ami chu Rev. V.L. Luaia Hranleh, Executive Secretary i/c PRESCOM, Mizoram Synod hian Pathian hnena hlanin a hawng zui nghal a. He building chhawng 3-a sak hi kawngpui an-ah showroom dah a ni a. Showroom hi a dung feet 45 a sei niin a vang lam hi feet 40 a zau a ni. Hei bakah hian stockroom leh thawktu chenna a hnuai lamah dah a ni bawk.
He Synod Bookroom building thar tur hi August 2022 atang khan buatsaih hna thawh tan a ni a. Ngawrh taka thla 2 chhung thawh a nih hnuah hawn theiha peih fel a ni ta a ni. Building thar hawn hnu hian Rev. H. Lallianzara, Administrative Secretary, Chhimbial chuan lehkhabu leiin ani hi Hnahthial Synod Bookroom Branch thara Lehkhabu lei hmasa ber a ni ta a ni.