Mizoram Presbyterian Kohhran chuan nakkum (2023)-a Puitling Sunday School zirlaibu tur "Kristiante Rinna Vawn Him" tih chu an tichhuak ta.
Mizoram Presbyterian Kohhran chuan kum 2023 hian Puitling Sunday School-ah "Kristiante Rinna Vawn Him" tih an zir dawn a. He zirlaibu hi Presbyterian Pastor-te zinga mithiam, Rev. Rosiamliana Tochhawng, Aizawl Theological College-a zirtir hna thawk mek ziah a ni. He zirlaibuah hian zirlai 46 awmin phek 259 zeta chhah a ni bawk. Mizoram puma Synod Bookroom dawr zawng zawngah lei theih tura chhawp chhuah mek a ni a, a chhut man Synod-in 25% a subsidised avangin Rs. 110 chauh-a lei theih a ni ang.
Mizoram Presbyterian Kohhran Puitling Sunday School zirlaibu hi Mizoram Synod hnuaia Kohhran zawng zawngte zirlaibu a nih bakah Presbyterian Church of Myanmar (PCM) hnuaia Phai Synod pumpui chuan an zirlaibu atan an hmang ve nghal zel a. Presbyterian Church of Myanmar leh Mizoram Synod Partnership Agreement angin Mizoram Synod chuan kumtin Copy 1000 zet a thlawnin Presbyterian Church of Myanmar hi a pe thin a ni.
Presbyterian Kohhran Puitling Sunday School zirlaibu hi Mizo lehkhabu malkhaiah chuan copy chhut chhuah tam ber a ni thin a. Kum 2023 atan hian Copies 90,000 zet chhut a ni.
Puitling Sunday School zirlaibu thar bakah hian Synod Calendar a phek keu chi chu peih fel a ni tawh a, tun atanga rei vak lovah 2023 Nilai Leh Beihrual Thupui Bu leh Naupang Sunday School zirlaibu thar lo chhuak leh tura beisei a ni.