Synod Inkhawmpui 2022 atana Synod Department hrang hrangte inruahman lawkna Committee chu Oct. 17 (Thawhtanni) atang khan neih chho zel a ni a, Oct. 24 (Thawhtanni) khan Theological Education Board an thu a, secretary-in report a pe a, ATC-a zirlaiten Presbytery Inkhawmpui ramchhung leh ram pawn hmun hrang hrangah tluang taka an hman thu te, Pro. Pastor exam tluang taka neih a nih thu leh ATC Faculty member ten hmun hrang hranga rawngbawlna an neih thu te report-ah hian tarlan a ni. Tun tumah hian thurel tur chhawpchhuah 19 a awm a ni.
Oct. 25 (Thawhlehni) khan Hospital Board an thu a, Secretary report-ah Service Manual 2021 chhut thu te, Mizoram Rural Bank atanga Bus thar dawn a nih thu te, CMC Vellore atanga MBBS zirlaiten Synod Hospital an tlawh thu te, CT Scan tihchangtlung thu te, Blood Bank License pek thar thu leh programme pawimawha telna hrang hrangte tarlan a ni a, tun tumah hian thurel tura chhawpchhuah 30 a awm a ni.
Oct. 26 (Nilaini) khan Pastoral Committee an thu a, Oct. 27 (Ningani) hian Education Board an thu a, Oct. 28 (Zirtawpni) hian Synod Literature & Publication Board an thu ang.
Board leh Committee peng hrang hrang te Oct. 31 - Nov. 4, 2022 chhungin hetiang hian an thu ang:
Oct. 31, 2022 (Thawhtanni) - Trust Committee
Nov. 1, 2022 (Thawhlehni) - Social Front committee
Nov. 2, 2022 (Nilaini) - Worship committee
Nov. 4, 2022 (Zirtawpni) - Partnership Committee.
Synod Inkhawmpui 2022 atana inruahman lawkna committee peng hrang hrangte hi Synod Moderator-in kaihruaiin Secretary report-te ngaihthlak a ni a, department budget 2023 - 2024 ruahmanna sawiho thin a ni bawk.