Nimin (Nov. 2, 2022) chawhnu dar 2:30 khan Rokunga chhungte leh Rokunga Memorial Society ten Pu Rokunga Kutziak Hla bu (manuscript) pahnih chu Mizoram Synod Archives-a vawn that turin an hlan.
Archives-a Pu Rokunga Hla Bu pekna inkhawm tawi hi Synod Office Devotion Room-ah neih a ni a, Synod Executive Secretary zinga Archives changtu Rev. V. L. Luaia Hranleh in programme a kaihruai a. Pu Rokunga fa la dam zinga upa ber Pi Lalengin chhungkaw aiawhin thu a sawi a, Rokunga Memorial Society aiawhin Secretary Pu Rochamlianan thu a sawi bawk.
Hla phuahtu Rokunga'n a kutziak ngeia a hlaphuah zawng zawngte a ziah chhuahna Hla Bu pahnih, kum 1942 leh kum 1950 bawr vela mi, manuscript hlu leh pawimawh em em chu Rokunga fate zinga la dam mi pathumte leh Rokunga Memorial Society hruaituten Rev. V. L. Luaia Hranleh hnenah an hlan a. A duh apiang tan thusawina hun hman zawhah Synod Archives Asst. Coordinator Pu John Lalhruaitluanga’n Synod Archives aiawhin lawmthu a sawi a ni.
He hunah hian Pu Rokunga chhungte leh Pu Rokungan a lo kaihhruai thinte, Mission Veng Kohhran Upa thenkhat leh sawm bikte an tel a ni.
For more Pics Click Here