Synod Multipurpose Training Centre (SMTC) buatsaih Lay Leaders’ Training vawi 217-na kharna inkhawm Graduation day chu November 5, 2022 zan khan neih a ni.
Training kharna inkhawm hi SMTC Hall-ah neih niin Rev. Lalrinthara, Programme Director-in programme a kaihruai a. Senior Executive Secretary Rev. C. Zorammawia’n thuchah sawiin trainee-te hnenah Certificate a hlan. Trainee-te tana tawngtaisakna hi Resource person aiawhin Rev. C. Chawngliana’n a hmang a, trainees-te atangin Upa R. Thanthuama leh Upa Sui Zam ten lawmthu an sawi a, Rev. Vanlalzuata, Resource person-in lawmthu a sawi bawk. Kharna hunah hian Tv. R. Lalmuanpuia’n fakna hla sain hun a hmang bawk.
Tun tumah hian Presbytery 4 - Aizawl Hmar, Aizawl Chhim, Aizawl Central leh Aizawl Hmarchhak Presbytery atangin Kohhran Upa 29 leh Myanmar (Chin Synod leh Phai Synod) atangin Upa 7, an vaiin Kohhran Upa 36 an tel thei a ni. Training-ah hian Resource person atan Rev. Vanlalzuata, Rev. C. Chawngliana, Rev. T.C. Laltlanzova, Rev. F. Lalrinnunga, Rev. Lalrinthara leh Upa Lalsawmliana te hman an ni.
Synod Multipurpose Training Centre hi kum 1996-a hawn a ni a, a hawn kum atangin Lay Leaders’ Training - Kohhran Upate puala Training hi kalpui char char a ni a, SMTC Office record-a a landan chuan tunah hian Kohhran Upa mi 7077 –in training an nei tawh a ni.
SMTC-ah hian Ministerial training leh Vocational training kalpui a ni a, Vocational training hi kum tluana neih a ni a, tunah hian trade chi hrang hrang 4 neih mek a ni a, January 2023 atangin trade 2 - Welding & Fabrication leh Electric Wiring & Repairing hawn thar tur a ni bawk.