Nimin (Nov. 14, 2022) chawhnu dar 2:30 khan Synod Social Front buatsaih Cement Mistiri Training kharna hun Synod Committee Room I, Synod Office-ah neih a ni.
Cement Mistiri Training hi Oct. 19 - Nov. 14, 2022 chhung khan Synod Rescue Home, Durtlangah neih a ni a. Zirtirtu atan mithiam rual (engineer) te rawih an ni a, mi 7-in training hi tluang takin an zo a ni. Training-ah hian kar khat chhung chu theory class neih nan hun hman a ni a, theory class zawhah Supervisor kaihhruaina hnuaiah practical training kar thum chhung neih a ni bawk.
Training kharna hun hi Pu R. Lalnuntluanga, Coordinator, Synod Socialo Front-in a kaihruai a. Upa Zirrokunga, Synod Social Front Executive Comt. member in tawngtaiin Trainging kharna hun Pathian hnenah a hlan a. Rev. Lallianmawia Pachuau, Director, Synod Rescue Home leh Training Manager-in training neih dan report a pe a, Training resource person aiawhin Er. S.R. Lalramthanga’n thu a sawi a, Trainees aiawhin Pu Gospel Laltlankima’n thu a sawi bawk.
Rev. Dr. K. Lallawmzuala, Executive Secretary, i/c. Synod Scoial Front chuan Training chhuakte hnenah Certificate leh Cement mistiri-te hmanraw mamawh tur thil chi hrang hrang a hlan a. A hlan zawhin Cement mistiri training buatsaih a nih chhante leh trainees te fuihna thuchah a sawi a. He training buatsaih tura ruahmanna lo siamtute Upa C. Lalduhawma leh Upa C. Chawngthangtluanga ten thu an sawi bawk. Hun tawp tawngtaina Rev. R. Laldika, Synod Social Front Office-in a hmang.
Synod Social Front hian eizawnna mumal neiloten eizawnna an neih theih nan kut themthiamna training chi hrang hrang Aluminium Mistiri Training te, Plumbing Training te a lo buatsaih tawh thin a. Tun tumah hian Cement Mistiri Training hi a buatsaih ve leh ta a. Heng training chi hrang hrang a training chhuak tam tak hian eizawnna an neih phah tawh a ni.