Vawiin (Nov. 18,2022) khan Mizorama Pathian Thu zirna inpui, Aizawl Theological College chuan kum tina an lo tih thin angin College Day vawi 57-na lawmna hun an hmang. Covid hrileng avanga kum hnih lai kalphung pangngaia lawm theih a nih loh hnuah kumin hian kimchang zawka programme hman theih a lo ni ta a ni.
Synod Moderator, Rev.Dr. Vanlalnghaka Ralte chuan he ATC hun pawimawh hi hmanpuin a lawmna inkhawm a kaihruai a. College Principal, Rev.Prof. Tlanghmingthanga chuan he programme hmangtute lawmna thu a sawi a, kum khat kaltaa ATC rawngbawlna peng hrang hrang report a pe bawk.
College Day speaker Rev.Dr. Lalchungnunga’n “Integrity: The Essential Quality” tih thupui hmangin thuchah a sawi. ATC Male Voice leh ATC Zaipawlpui ten Pathian fakna hla an sa a, Rev.C. Zorammawia, Senior Executive Secretary, Mizoram Synod leh Rev. Z.D. Lalhmachhuana, Synod Secretary (Sr.) te’n Zirlai ti tha bikte hnenah lawmman an hlan a. Lawmman hrang hrang zinga ngaihhlut hlawh ber pakhat, Best Outgoing Student lawmman chu Lalfelkima, Khatla South hnenah hlan a ni.
Hun tawp lamah Prof. Lalrindiki Ralte, Dean, Post Graduate Studies chuan lawmthu a sawi a. Rev. Lalthangmawia, Synod Theological Education Board member chuan malsawmnain College Day lawmna hi a khar a ni.
College Day-ah hian ATC Faculty in Literary Project an neih zinga lehkhabu pahnihna “Mizo Christianity” tih Saptawnga ziah chu Synod Moderator, Rev.Dr. Vanlalnghaka Ralte chuan a tlangzarh a. He lehkhabuah hian Mizo Kristianna ziarang leh kalphung kawng hrang hranga thlirna thuziak sawmhnih leh paruk lai a awm a. Phek 350 a chhah niin Rs.350/- man a ni.
Aizawl Theological College hi Mizorama Pathian thu zirna ding hmasa leh changtlung ber a ni a. Zirtirtu thawk nghet 27 awm mekin nghet lova thawk 5 an awm a. Office leh a chhung hmunhma hrang hranga thawk hi a nghet leh ni bi-a rawihte nen mi 30 an awm thung.
BD Zirlai hi 112 an nei mek a, M.Th. zirlai 59, D.Th. zirlai 18 leh DCPC zirlai 5 an awm bawk. Tunah hian mi194 in ATC ah hian Pathian thu an zir mek a ni.