Synod Executive Committee (SEC) Vawi 252-na thurel No. 41-in Synod Bookroom Headquarters Building sak that tura a lo rel chu tluang taka a sak hna te kalpui chhoh a nih hnuah hawn tura peih niin Nov. 24, 2022 (Ningani) chhun dar 12:30 khan Rev. Dr. Vanlalnghaka Ralte, Moderator, Mizoram Synod chuan Pathian hnena hlanin a hawng.
Synod Bookroom Building thar hawn inkhawm hi Synod Bookroom building thar kawt zawla hman niin Rev. V.L. Luaia Hranleh, Executive Secretary, i/c PRESCOM etc. chuan a kaihruai a. Building thar sa tura hmalak chhoh a nih dan leh hmasawn chhoh dan bakah building sak a nih dan te Upa H. Ronghaka, General Manager, PRESCOM hnen atangin ngaihthlak a nih hnuin Mizoram Synod Choir-ten Pathian fakna hla an sa a. Hemi hnu hian Rev. Dr. Vanlalnghaka Ralte, Moderator, Mizoram Synod chuan Synod Bookroom Headquarters Building thar chu a hawng zui ta a ni.
Synod Bookroom Headquarters Building thar hi Mizopa chhiara chhawng 6 niin a hnuai berah dawrtute tan Parking siam tel a ni a, hemi nena building pumpui chhuat zau zawng hi Square feet 27,680 zet a tling. Synod Bookroom Headquarters Building thar hian ban 34 neiin a dung sei zawng hi a sei lai berah feet 123 a ni a, a vang lam hi a zau lai berah feet 77 a ni bawk. A chhawng hnuai bera dawrtute tana lirthei dahna tur zau zawng hi Square feet 2,720 a ni a, hetah hian dawrtute tan lirthei ke hnih nei chi 24 leh ke pali nei chi 8 dah theih tura duan a ni. Kawngpui an-ah hian Headquarters Showroom dah a ni a, a zau zawng hi feet 123 a sei, feet 30-a zau niin India rama lehkhabu dawr lian pawl tak a ni pha.
Showroom chungah hian Bookroom dawr bungrua dah khawlna (Stockroom) chhawng hnih feet 100 a sei, a zau laia feet 77 a zau ve ve siam a ni a, Stockroom pum puia lehkhabu dah theih zat hi Cubic feet 21,400 lai niin Mizoram chhung leh pawna Synod Bookroom lehkhabu mamawh chu helai hmun atang hian pek chhuah a ni dawn a ni.
Stockroom chungah hian Synod Office an-in PRESCOM Department General Administration Office, Bookroom Office leh Committee Room a awm a. Office chungah hian Synod Canteen-II leh PRESCOM General Manager Quarters dah a ni a. A chhawng chungberah thawktu quarters Type V pahnih dah a ni bawk. He building thar danglamna chu basement leh a chung chhawng li, a vaia chhawng 5-ah hian Motor a tlan lut thei vek a ni.
He Building sakna bik atan hian Synod chuan Rs. 8,16,39,000.00 a ruahman a. Ruahman ang taka sak chhoh niin a building sak dan tur ruahmantu atan TBL Architechtural Consultants, Khatla hman an ni a. A sak hna hi C.T Mawia Construction, Kolasib-in an thawk thung. Showroom-a lehkhabu chhuar hrang hrang siamtu atan Mawitea Timber & Steel Works, Ramrikawn rawih an ni a, Stockroom-a lehkhabu chhuar hi thir hmanga siam vek a ni a, hei hi K.L. Steel Fabrication, Mission Veng ten an thawk thung a ni.
Synod Bookroom Hqrs Building hmasa, 1978 kuma sak chu Nov. 23, 2017-ah thiah hna thawh tan niin July 17, 2018-ah a ban hmasa ber phun tan a ni. Ruahmanna hmasaah kum thum chhunga sak zawh tura ruahman ni mahse, Covid 19 hripui leng avangin a hun tura ngaihah peh hman a ni ta lova, Building hmasa thiah tan atanga kum 5-na chiah Nov. 24, 2022-ah Building thar hi hawn theiha peih fel a lo ni ta a ni.
For more Pics Click Here