Mizoram Presbyterian Kohhran chuan nakkum (2023) atana Nilai leh Beihrual Thupui zirlaibu tur chu a tichhuak ta a, Synod Bookroom Branch Distribution Center-ah te lei theiha chhawp chhuah a ni ta.
Nilai leh Beihrual Thupui bu hi Mizo lehkhabu malkhaiah Puitling Sunday School zirlaibu tih lovah chuan copy chhut chhuah tam ber a ni a. Copy 70,000 zet chhut a ni.
Nakum 2023 hian Mizoram Presbyterian Kohhran chuan Nilai leh Beihrual Thupui-ah “Mizoram Presbyterian Kohhran Inrelbawl dan” tih an zir dawn a. Presbyterian Pastor-te zinga mi thiam leh tawn hriat ngah, Field Secretary leh Executive Secretary hial lo ni tawh Rev. B. Sangthanga ziah a ni.
Tun tum Thupui bu hi phek 234 zeta chhah ni mahse Rs.140/- chauhvin a hralh chhuah a ni a. Mizoram puma Synod Bookroom dawr zawng zawngah lei theih tura chhawp chhuah mek a ni. Mizoram Synod chuan Nilai leh Beihrual Thupui bu hi Kohhran Upa leh Pastor-te a thlawnin a pe thin a, nakkumah pawh hian an dawng leh thei dawn bawk a ni.
2023 Nilai Leh Beihrual Thupui Bu bakah Synod Calendar, phek khat chi chu peih fel a ni ta a, kumtin Synod Calendar phek mal chi-ah hian Synod Statistics pawimawh tarlan tel thin, Rs.20/- a lei theih a ni ang. Puitling Sunday School zirlaibu thar pawh tichhuah tawh a ni a, Naupang Sunday School zirlai bu thar pawh tih chhuah kim a ni tawh bawk.