Nimin (Nov. 29, 2022) khan Presbyterian Bible School (PBS) chuan Batch 53-na pualin Farewell and Dedication Programme Pi Zaii Hall, Synod Conference Centre-ah an hmang.
Programme hi Rev. Lalrinsanga, Principal-in a kaihruai a, Rev. T. Thuamliana, PBS Zirtirtu-in inlawmna leh inhmelhriattirna hun a hmang a. PBS Zirtirtu Rev. Ramngaihawma Khiangte-in report a pe a, Synod Moderator Rev. Dr. Vanlalnghaka Ralte-in zirchhuakte hnenah Certificate hlanin thuchah a sawi a, zirlai exam-a titha te leh class kal kimte hnenah Rev. Dr. P.B. Lalmalsawma, PBS Committee member-in lawmman a hlan a, Pu C. Awithanga Award chu Rev. Lalfakawma, PBS Committee member-in a hlan bawk. Rev. V. Lalkima, PBS zirtirtu-in zirlaite tana tawngtaisakna a nei a. Rev. Lalengzika, PBS Zirtirtu-in lawmthu a sawi a, zaithiam Tv. Jerry Lalrinawma a zai bawk.
PBS-ah hian a din tirh atangin tun thleng hian zirlai 2562 an awm tawh a, chung zinga 2169 ten tha takin an pass tawh a. Tuna batch 53-naah hian zirlai 44 awmin zirlai 39 ten tha takin an pass a, exam lo 4 an awm.
Exam-a titha zual pathumna thlengin lawmman Rs.1000/-, Rs.700/-, Rs.500/- leh lawmpuina thuziak PBS Committee hminga hlan an ni a, chungte chu:-
1-na - H. Lalthlamuana s/o H. Lalkhuma, Dinthar Vengthlang Kohhran
2-na - Lalramhluni d/o T. Lawmsanga, N. Vanlaiphai Damdawi Veng Kohhran
3-na - Jerry Zomuanpuia s/o Thangruma, Champhai Kahrawt Kohhran te an ni.
Batch 53-na zirlai zingah hian class kal kim mi 12 an awm a, lawmman Rs. 500/- theuh hlan an ni.
Kum 2014 atangin zirlai zinga Christian Theology leh Kohhran Inrelbawlna & PCI Constitution Subject-a titha ber hnenah Pu C. Awithanga Award hlan thin a ni a, award hian pawisa fai Rs.1,000/- a keng tel a ni.
Tun tumah hian Lalduhawma’n Christian Theology Subject-ah 91% a hmu a, H. Lalthlamuana’n Kohhran Inrelbawlna & PCI Constitution Subject-ah 94% a hmu a ni.