Mizoram Synod, Family Guidance & Counselling Centre (FG&CC)-in November 16, 2022 atanga Pastor-te puala Intensive Residential Pastoral Care & Counselling Training vawi 30-na, Synod Conference Centre-a a buatsaih chu nizan (Nov. 29, 2022) khan ‘Final Evaluation & Graduation Service’ neiin khar a ni.
He Counselling Training-ah hian Mizoram Synod hnuaia Pastor 27, Chin Synod, Myanmar atangin Pastor 2 leh Phai Synod, Myanmar atangin Pastor 3, an vaiin mi 32 training-ah hian an tel a ni.
Training kharna inkhawm hi Rev. Lalsangbera, Director, FG&CC-in a kaihhruai a, He hun hmanpuitu Rev. C. Zorammawia, Senior Executive Secretary chuan Training chhuakte hnenah Certificate semin thuchah a sawi a, "Counselling chu mi tin mamawh a nih avangin kan rawngbawlna hmun apiangah mi dangte harsatna sutkianpuitu nih i tum ang u" tiin, training chhuakte chuan an thil zirte chu midang te tana tangkai taka hmang turin a fuih a ni.
Training kharna inkhawmah hian Training chhuakte chuan an hlawkpui dan a lema an ziak chu entirin an hrilhfiah a, Rev. C. Rosangzuala, Damdep Bialtu Pastor-in training chhuakte aiawhin thu a sawi a. Chanmari West Pastor Bial Zaipawlte tum hnih zaiin, FG&CC Com. Member zinga mi Upa R. Lalmalsawma'n Training chhuakte a tawngtaisak a ni.
FG&CC hian Pastor leh Kohhrana rawngbawltu pawimawh (Church Leader)-te pualin Counselling Training buatsaih thin a ni. Pastor-te pual hian kum 1992 atang khan buatsaih thinin Pastor 535 training chhuak an awm tawh a. Tin, Church Leader te pualin kum 2002 atang khan vawi 35 buatsaih tawhin mi 781 Training chhuak an awm tawh bawk a ni.
Synod hian Counselling Centre pakua - Mission Veng, Bawngkawn, Vaivakawn, Champhai, Serchhip, Kolasib, Lunglei, Mamit leh Khawzawlah te a nei a. Heng Counselling Centre pakuaah hian November 15, 2022 thlenga pantu (Client) an neih tawh zat chu 49,491 niin, kumin 2022 bikah mi 7,207 in an pan tawh a ni.