Synod Inkhawmpui vawi 99-na chu December 6 - 11, 2022 chhung hian Khatla Kohhran Biak Inah neih a ni dawn a, Khatla Bialin thlengin an thleng ang.
Dec. 6 (Thawhlehni)-ah Nomination Committee an thu ang a. Dec. 7 - 10, 2022 chhungin Rorel a ni ang a, zan lamah vantlang Pathian Biak inkhawm a awm ang. Dec. 11 (Pathianni) Chawhmaah Pastor nemngheh leh Pro. Pastor dahngheh inkhawm neih a ni ang a, Chawhnuah Lalpa Zanriah Sacrament kilho a ni ang a, zanah Moderator valedictory sermon ngaihthlak a ni ang.
Kumin Synod Inkhawmpui Thlarau lam thupui chu 'Pathian Lalna leh thuneihna' (Rom 11 : 36) a ni a, Dec. 10 (Inrinni) zanah Rev. Lalsangmuana, Tanhril-in Thlarau lam thupui a sawi ang.
Kumin 2022 Synod Inkhawmpuia Synod Puipa turte chu heng te hi an ni :
Moderator : Rev. Dr. C. Chawnghmingliana
Secretaries : Rev. Z.D Lalhmachhuana (Sr.) & Upa B. Lalhmunliana (Jr.)
Finance Officers : Rev. V.L Luaia Hranleh & Rev. P.C Pachhunga
Statistician : Rev. Lalsangbera
Senior Exe. Secretary : Rev. C. Zorammawia
Executive Secretary : Rev. Dr. K. Lallawmzuala
Synod Inkhawmpui hi kum 2010 atang khan Bial-in an thleng tan a, kumin 2022 hian Khatla Bialin Khatla Kohhranah an thleng dawn a ni.
SYNOD INKHAWMPUI VAWI 99-NA | Inkhawmpui Rorel Report - 1 (December 7, 2022)
Synod Inkhawmpui Vawi 99-na Rorel ni khatna chu a lo zo ta a. Vawiin khan Nomination leh Pastoral thu bakah General number 2-na thleng zawh hman a ni.
Zing dar 9:30-ah inkhawm tan niin, Moderator inthlakna neih a ni a. Rev. Dr. Vanlalnghaka Ralte chuan Rev. Dr. C. Chawnghmingliana hnenah Moderator mawhphurhna a hlan a ni.
Synod Inkhawmpui vawi 100-na, December 1 -10, 2023 chhunga neih tur chu Mission Veng Bialin Mission Veng Kohhran Biak Inah an thleng dawn a. Chuta Puipa turte chu :
Moderator : Rev. R. Vanlalnghaka, Chanmari
Secretary Sr. : Upa B. Lalhmunliana, Bethlehem Venglai
Secretary Jr. : Rev. PB Mankima, Chhinga Veng
Finance Officers : Rev. VL Luaia Hranleh & Rev. PC Pachhunga
Statistician : Upa Dr. Lalnunsiama Colney, Ramthar Tlangveng
Sr. Executive Secretary : Rev. C. Zorammawia
Executive Secretary : Rev. Dr. K. Lallawmzuala
Synod Inkhawmpui thlengtu tur hi kum 3 hma lama lo ruat lawk thin a nih angin kum 2026-a Synod Inkhawmpui chu Chanmari Kohhran Biak Inah nghah a ni a, Chanmari Bialin an thleng dawn a ni. Inkhawmpui hmasa lamin Inkhawmpui nghahna tur a lo ruat tawhte chu - Kum 2023-ah Mission Veng Biak In, 2024-ah Mission Vengthlang Kohhran Biak In, kum 2025-ah Zarkawt Kohhran Biak In.
Tun tum Synod Inkhawmpuiah hian nikum inkhawmpui nena inkara Minister boral mi 4 sun an ni dawn a. Chungte chu - Rev. Hesei Vaiphei, Rev. Sairengpuia Sailo, Rev. Dr. Lalchhuanliana leh Rev. Lalhmingthanga. December 11, Pathianni chawhnu inkhawmah sunna hun hman a ni ang.
Kuminah hian Pastor atana nemngheh tur 15 kan nei a. Pastoral hnuaiah 9, SMB hnuaiah 3, Field Worker 1 leh Manipur Area hnuaiah 2 te nemngheh an ni ang. Tin, Pro Pastor atan Pastoral hnuaiah mi 10, SMB hnuaiah 2, Field Worker 4 leh Tangphai Provisional Synod-a thawk tur 2-te ruat an ni ang. Pastor nemngheh leh Pro Pastor ruat inkhawm hi December 11, Pathianni chawhmaah neih a ni ang. Minister/Pastor pension-a chhuak tur mi 10 an awm bawk a, Pathianni Chawhma inkhawmah hian pension certificate hlan an ni bawk ang.
Kum 2023 Pastoral Ministry thupui atan, "I ram lo thleng rawh se" Matthaia 6:10 thlan a ni a. Kum 2023-ah Pastoral hnuaiah Pro. Pastor 12 lak tura rel a ni bawk.
General Agenda 42 awmah number 2-na thleng zawh hman a ni a -
(1) "Kan rama Kohhran behchhan mumal nei lote hi Synod-in hma lain seng khawm dan kawng zawn ni rawh se", tih thu Aizawl West Presbytery atanga lut chu, "Pastor Bial tinah a thara tan lak ni se" tia rel a ni.
(2) "Kohhran pawimawhna inzirtir uar thar leh ni rawh se", tih thu Aizawl Hmar Presbytery atanga lut chu, "Bial tinah chak zawkin hma lak ni se" tia rel a ni.
Dar 3:45-ah rorel minute chhiar a ni a, siam rem ngaite siam rem a nih hnuah pawm a ni. Dar 4:35-ah Rev. Vanlalvena'n malsawmnain rorel inkhawm a tin a ni.
SYNOD INKHAWMPUI VAWI 99-NA | Inkhawmpui Rorel Report - 2 (December 8, 2022)
Synod Inkhawmpui Vawi 99-na Rorel ni hnihna zawh a ni a. Vawiin khan agenda 18 rel zawh hman a ni.
Chawhma dar 9:30-ah Inkhawmpui rorel tan a ni a. Rev. Dr. C. Chawnghmingliana, Moderator-in inkhawm kaihruaiin, Pathian thu Amosa 5:24 a chhiar a. Pathian fakna hla KHB number 360-na sak a ni a. He mi zawh hian Upa Ngurtinchhinga, Kawrthah South chu Pathian hnenah a tawngtai.
Rorel ni 2-naah hian General Agenda 3-na atangin rorel bul tan a ni a, thurel tlangpuite chu heti ang hi a ni -
* Corruption leh a kaihhnawih do chungchang, Champhai North, Tuichangral North, Aizawl Bethel, Tuivai, Hmarphei, Chhimphei, Aizawl Central, Aizawl East Presbytery atanga lo lut chu Kohhranin nasa zawka hma lak ni se, SEC-in lo bawh zui se tih a ni.
* "Thil zawrh leh hralhah bukna leh tehna dik kan hman theih nan Synod-in hma la rawh se" tih Aizawl West Presbytery atanga lut chu thil pawimawh tak a ni a, Kohhran tinah thahnemngai taka bawhzui ni se tih a ni.
* "Kan ram leh hnam siam thatna turin khawtlang leh ram hmasawnna hnathawktuten rinawm leh dik taka hna an thawh theih nan Synod-in hma la rawh se" tih Aizawl East Presbytery atanga lut chu Synod Social Front hmalak mekna a ni a. Thil pawimawh tak a nih avangin tun aia nasa zawkin hma lak ni se tih a ni.
* "Kan Kohhran hmunhma leh thil dang hming vuah/phuah a nihin 'Presbyterian' tih telh ni zel rawh se" tih thu Aizawl West II Presbytery atanga lut chu tuna kal dang pangngai hi a la tha tawk e, tih a ni.
* Delhi-a Synod in hralh a, a dang lei rawtna Chhimthlang leh Aizawl Chhimthlang Presbytery atanga lut chu Synod 2019-ah rel a lo ni tawh a. Rel theih tura hun bi tiam a la tlin loh avangin ngaihtuah theih a la ni lo e, tih a ni.
* "Synod Hall lian sakna tura ruahmanna kal mek ennawn chungchang" Khawthlang Presbytery atanga lut leh, SEC atanga thu lut, "Synod-in Bawngkawna Hall lian a sak tur hman dan a duan en that rawtna" chu la kawpin, hall lian sa tura hma kan lak mek hi chhunzawm zel ila, a hman dan tur chu a tul dan azira en zui zel ni se, tih a ni.
* PRESCOM dinhmun en that chungchang Aizawl Bethel leh Aizawl West 1 Presbytery atanga lut chu tha tih tlan a ni a. SEC-in lo bawhzui se, Synod-ah rawn thlen leh se, tih a ni.
* Pian pun chungchanga hmalak rawtna, Aizawl Bethel leh Serlui Presbytery atanga lo lut chu nau piang kan pun theih nan chak zawka hmalak ni se, Bial leh Kohhran malah hmalak ni se, tih a ni.
* "Mizo mipate thi rate sang mek a ziaawm theih nan Synod-in hma la rawh se" tih thu Aizawl Bethel Presbytery atanga lut chu tha titlangin, SEC bawhzui tura tih a ni.
* "Synod Service Board hna lak dan hi en that ni rawh se" tih thu Aizawl Bethel Presbytery atanga lut chu en that ni se, tih a ni a. Hman nghal turin SEC-in lo bawh zui se, tih a ni.
* "Kan ram hruaitute khalh ngil tur hian Synod-in tun aia chakin hma la rawh se" tih Tuivai Presbytery atanga lut pawh tha tih a ni a, SEC bawh zui tura tana tih a ni bawk.
* "Synod Pastoral Committee thu Pastor transfer and posting hi tih confidential tawh loh ni rawh se" tih thu Tuivai Presbytery atanga lut chu kan kal dan pangngai hi a la tha tawk e, tih a ni.
* "Bial hmui a awm loh nan Synod-in kawng zawng rawh se", tih thu Tuirini Presbytery atanga lut chu tha tiin, kum 2023 atanga hman tan turin SEC-in lo bawh zui se, tih a ni.
* "Halpuah leh puak thei thil dang Krismas leh kumthara sawrkarin hal a phal loh hi thingtlang leh khawpui chhungah khauh zawka khap a nih theih nan Kohhranin hma lak ni rawh se" tih Sakawrhmuituai Presbytery atanga lut chu tha tih tlan a ni a. A rang lama Kohhranhote hriattir ni se, tih a ni.
* "Nupa chungchang dan hi en that a, tihchangtlun ni rawh se" tih Aizawl Central Presbytery atanga lut chu en that ni se, SEC-in lo bawhzui se, Synod-ah rawn thlen leh rawh se, tih a ni.
* Synod Hospital-a ngelnghet zawka doctor neih theih dan kawng zawn chungchang Aizawl Central leh Champhai South Presbytery atanga lut chu hmalak mekna a ni e, tia inhrilhfiah a ni.
* "Synod Hospital dinhmun zir chiana, a kal zel dan tur ruahman that ni rawh se" tih Aizawl Bethel atanga lut chu SEC-in lo en tha se, Synod-ah rawn thlen leh rawh se, tih a ni.
* "Synod Hospital Durtlanga Charity Fund atan dan zawh kim pakhatin Rs. 20 thawh ni rawh se" tih thu Tuivawl Presbytery atanga lut chu 2020 Synod-ah rel a lo ni tawh a. Kum thum a la tlak loh avangin tun tumah chuan rel a la rem lo e, tia inhrilhfiah a ni.
Tlai dar 4:00-ah rorel minute ngaihthlak a ni a, siam rem ngaite siam that a nih hnuah pawm a ni. Dar 4:23-ah Rev. Lalruatthanga'n malsawmna-in rorel inkhawm a tin a ni.
SYNOD INKHAWMPUI VAWI 99-NA | Inkhawmpui Rorel Report - 3 (December 9, 2022)
Chawhma dar 9:30-ah rorel inkhawm tan a ni a. Rev. Dr. C. Chawnghmingliana, Moderator-in Pathian thu Rom 12:8 a chhiar a. Upa Lalzama, Saikhamakawn chuan Pathian hnenah tawngtaiin rorel inkhawm a hlan.
Rorel ni 2-naah General Agenda 21-na thleng zawh hman a ni a. Ni 3-naah hian number 22 atangin bul tan a ni. Thurel tlangpuite chu -
* "Chanchin Tha thlen ni, March ni 15 hi Kohhran hoten kan ngaih pawimawh theih nan kum 2024-ah ram puma hman turin Synod-in programme lian tham siam rawh se", tih thu Aizawl Hmar Presbytery atanga lut chu kan kal dan ngai hi a la tha tawk e, tih a ni.
* Synod hnuaia transfer & posting chungchang, Dampa, Chhimchhak, Aizawl Chhim leh Chhimthlang Presbytery atanga thu lut chu SEC-in lo zir chiang se la, an rawtna nen Synod-ah rawn thlen leh rawh se, tih a ni.
* "Synod-in Pathian Ram ip hi ke pathuma a siam bak hi chu Kohhran malin siam belh tawh loh ni se", tih thu Chhawrpial Presbytery atanga lut chu inkaihruaina awm sa ang a ni a. Pathian Ram ipah ke thum awm sa (Pathian Ram, Ramthar leh Tualchhung) bak dah belh lo tur leh inkaihhruaina awm sa zawm zel turin Kohhranhote kan inchah, tih a ni.
* "Kristian Diary Bu a thlawna sem thin hi tihtawp ni rawh se", tih thu Tuivawlral Presbytery atanga lut chu kan kal dan pangngai hi a la tha e, tih a ni.
* "Chawngte L hmuna Synod ram hi Chakma hnam zinga rawngbawl nan hman tangkai ni rawh se", tih thu Khawthlangtuipui Presbytery atanga lut chu hmalak mekna a nih thu inhrilhfiah a ni.
* "Mizoramin Land Reform leh Land Ceiling dan mumal tak kan neih theih nan Synod-in hma la rawh se" tih thu Tuichang Presbytery atanga lut chu chak zawkin SEC-in bawhzui rawh se, tih a ni.
* "Tumkau Ni chawhma inkhawm hi Tumkau Ni programme-a hman ve ni rawh se" tih Tuivawl Presbytery atanga lut chu tha tih a ni a, kum 2024 atanga hman tan ni se, tih a ni.
* "Mission Development Training Centre (MDTC), Bualpuiah Veterinary Field Assistant (VFA) training centre hawn a nih theih nan Synod-in hma la rawh se" tih thu Serlui Presbytery atanga lut chu tuna kan kalpui mek dan hi a la tha tawk e, tih a ni.
* "Synod-in High School dang Aizawlah din belh dan kawng zawng rawh se" tih thu Aizawl West II Presbytery atanga lut chu Synod-in a rel (Synod 2019) atanga kum 3 a la liam loh avangin rel a rem rih lo e, tih a ni.
* "Lungleiah High School leh Higher Secondary School Synod-in din rawh se" tih thu Lunglei West Presbytery atanga lut chu Synod 2019-in inrenchem chungchang a relah, 'Kum 3 chhung chu project lian hma thar lak rih loh ni se' a tih chuan he agenda pawh hi a huamah kan ngai a. Chuvang chuan he rawtna hi rel a rem lo e, tih a ni.
* Mizoram Assembly inthlanpui atana tawngtairual rawtna chungchang Lunglei West, Ramlai leh Aizawl Chhimthlang Presbytery atanga lut chu tha tih a ni a. SEC-in ruahmanna lo siam rawh se, tih a ni.
* Politics siam tha tura hmalak rawtna thu Aizawl Hmar leh Aizawl East Presbytery atanga thu lut chu sawihona eng atangin SEC-in chak zawkin hma lo la rawh se, tih a ni.
* "Inthlanna felfai tak neih theih nan Synod-in hma la rawh se", tih thu Tuichangral South Presbytery atanga lo lut chu kan kalphung pangngai, Synod Social Front hmalak mekna hi kan kal dan tur a la ni zel e, tih a ni.
* "MPF hi tun aia tihchak lehzual ni rawh se", tih thu Tuichangral South Presbytery atanga lo lut chu MPF hi Synod hnuai a nih loh avangin kan sawihona hi a tawk e, tih a ni.
* "Mizorama cancer tam ta lutuk hi a lo tlem theih nan awareness campaign neih dan kawng Synod-in zawng rawh se", Aizawl West I Presbytery atanga thu lut chu a tha e, tih a ni a. SEC bawh zui tura tih a ni.
* "Campus Ministry hmalaknaah hian tleirawlte pual rawngbawlna kalpui ve ni rawh se" tih thu Aizawl West I Presbytery atanga lo lut chu Campus Ministry inkaihhruaina zuia kal zel tur a ni e, tih a ni.
* "Synod-in Masihi Sangati rawngbawlna hi hei aia chak zawk hian kalpui rawh se" tih Aizawl Hmar Presbytery atanga thu lut chu kan kal dan ngai hian kal zel ni se, tih a ni.
* "Mizoram State Lottery tih tawp ni rawh se" tih Aizawl Hmar Presbytery atanga lut chu tha tiin, tun hmaa kan lo ngen tawh angin titawp tura sorkar ngen leh ni se, tih a ni.
* Mizorama Grape thar atanga siam sacramental wine atana hman rawtna thu Champhai North Presbytery atanga lut chu SEC-in lo zir chiang se, an rawtna nen Synod-ah rawn thlen leh se, tih a ni.
* "Synod Rescue Home hi Synod-in Policy a neih angin tun aia chak zawkin tihlen ni rawh se" tih Aizawl West II Presbytery atanga thu lut chu kan kalpui mek lai a ni e, tia inhrilhfiah a ni.
* "Jail tang chhuak hlimte tan chawlh lailawkna in, Synod-in siam rawh se" tih Aizawl West II Presbytery atanga lo lut chu tha tih a ni a, SEC-in zir chiang se, an rawtna te Synod-ah rawn thlen leh rawh se, tih a ni.
* SEC atanga thu lut Pay Commission din chungchang chu tha tih a ni a, SEC-in lo bawh zui se, Synod-ah rawn thlen leh rawh se, tih a ni.
Dar 3:45-ah rorel zo-in, minute ngaihthlak a ni a. Siam rem ngaite siam rem a, pawm a nih hnu dar 4:22-ah Rev. C. Biakmawia'n malsawmna-in rorel a tin a ni.
Vawiinah agenda 25 rel zawh hman a ni a, rorel hun hi ni khat la awmin, thurel tur hi 13 a la awm a. Tin, 2023 - 2024 budget pharh a ni ang a, report hrang hrang pek tur a la awm bawk.
December 9, Ningani thlenga rorel palai in-report zat chu 2186 an ni.
SYNOD INKHAWMPUI VAWI 99-NA | Inkhawmpui Rorel Report - 4 (December 10, 2022)
Rev. Dr. C. Chawnghmingliana, Moderator kaihhruaiin chawhma dar 9:30-ah rorel inkhawm tan a ni a. Pathian fakna hla Kristian Hlabu no. 58-na sa-in, Pathian thu I Timothea 5:17 a chhiar a. Upa Lalchawimawia, Saron Veng-in Pathian hnenah rorel inkhawm a hlan.
Rorel ni 4-naah hian SEC atanga thu lut hrang hrang bakah 2023-2024 Synod Budget pharh a ni a. Statistics reports ngaihthlak a ni bawk. Thurel tlangpuite chu -
* SEC atanga thu lut Synod Mission Board hnuaia Contract Missionary-te chungchang zir chianna leh rawtna leh General Agenda number 19-na Contract Missionary kum 2008 hmaa lakte tihngheh rawtna, Aizawl Central Presbytery atanga lut chu sawi kawp a ni a. SEC zir chianna leh rawtna chu tha tih tlan a ni a. Hman nghal turin lo chul mam rawh se, tia rel a ni.
* Synod Pensioners hlawh chhut dan leh Synod Pension Dan 2014 Bung IX:B & VII; C:3 kalpui dan tur chungchang chu SEC rawtna anga pawm a ni.
* Synod Inkhawmpui Vawi 100-na hriatrengna tur thil eng emaw buatsaih tura rawtna chu tha tih a ni a, SEC-in ruahmanna rawh se, tih a ni.
* Synod Mission Board hnuaia Pastor lak dan Policy neih chungchang ruahmanna chu pawm a ni.
* Synod motor chungchang zir chianna leh rawtna chu pawm a ni.
* Pastor Quarters Type Plan ennawn rawtna pawh tha tih a ni a, hman nghal turin SEC-in lo en tha rawh se, tih a ni.
* Synod thlengtu puihna rate ennawn rawtna chu tha tih a ni a. Rs. 10,00,000-a puih thin chu Rs. 15,00,000-ah tihpun ni se, kumin Synod atang hian hman tan ni se, tih a ni.
* PCI Thurin 10-te tlawhchhan Bible chang tarlan dan kawng zawn rawtna chu tuna a awm dan pangngai hi a tawk e, tih a ni.
* Family Guidance & Counselling Centre counsellor quarters sak policy ruahmanna chu tha ti a, pawm a ni.
* Pastor pension-te politics-a an inhman dan tur kaihhruaina siam chu kan sawihona hi a tawk e, tih a ni.
* Synod Hospital kum 100-na puala project ruahmanna chu tha tih a ni a, SEC-in lo bawh zui se, tih a ni.
* Education tihhmasawn nana Kohhran leh sawrkar thawh dunna tura rawtna chu a tlangpuiin tha tih a ni a. Chul mam ngaite a tul ang zela chul mamin, SEC-in lo bawh zui rawh se, tih a ni.
* Kum 2023 - 2024 Synod Budget atana ruahmanna chu siam rem ngaite siam rem a nih hnuah pawm a ni.
* Statistics report atanga a lan danin August 2022 thlenga Mizoram Presbyterian Kohhran mi zawng zawng chu 6,18,854 an ni a. Mipa 3,00,279, hmeichhia 3,18,575 an ni.
Dar 4:15-ah rorel zoin minute chhiar a ni a. Siam rem ngaite siam rem a nih hnuah pawm a ni. Minute bu-ah Moderator leh Secretary-ten hming an ziak a, palaiten dingin an hriatpui.
Dar 4:45-ah Rev. Dr. Vanlalnghaka Ralte-in tawngtaina-in Synod 2022 inkhawmpui rorel a tin a ni.
For more Pics Click Here