Rev. F. Lalrinawma (kum 54), Champhai Bethel Pastor Bial vawng mektu chu January 3, 2023 (Thawhlehni) khan an Quarters-a step-ah chesual palhin a boral a, a ruang hi an mahni chenna khua, Khumtungah lak niin nimin (Jan. 4, 2023) khan Synod Moderator Rev. Dr. C. Chawnghmingliana’n Khumtung Presbyterian Kohhran Biak Inah a vui.
Vuina inkhawmah hian Synod Secretary Upa B. Lalhmunliana’n a chanchin tlangpui a sawi a, Synod Moderator Rev. Dr. C. Chawnghmingliana’n thlamuanna thuchah a sawi. Rev. C. Zorammawia, Senior Executive Secretary-in Tawngtaisakna hun a hmang a, Baktawng Pastor Bial Zaipawl an zai a, Rev. P.B. Mankima, Synod Secretary (Jr.) in malsawmnain vui inkhawm programme a khar a ni. Thlanmual lamah Rev. Gospel Thanmawia, Moderator, Tawi Presbytery-in hun a hmang thung a ni.
Rev. F. Lalrinawma hi Upa Lalsiama (L) leh Pi Kapmawii (L) te fa 6 zinga a naupang ber niin 25.4.1968-ah Baktawngah a piang a. A unaute chu :
1. Upa F. Zothansanga h/o Lalchungnungi, Khumtung
2. Pu F. Lalriliana h/o Laltlanmawii, Khumtung
3. Pu F. Lalthazuala h/o Lalrinpari, Khumtung
4. Lalnunmawia (L)
5. Lalbuatsaihi (L)
6. Rev. F. Lalrinawma h/o SR Lalthlamuani
Kum 1979-ah Baktawng atangin Khumtungah an pem thla a. Kum 2019 January ni 9 khan SR Lalthlamuani (Mamuani) nen an innei a, fa pahnih Johan Lalhruaitluanga leh Maria Rinmuanpuii an nei a ni.
Zirna lam : Primary School hi Baktawngah a kal a, Middle School leh Secondary (High) School hi Khumtungah a zir zo a. Pachhunga University College-ah B.Com a zir laiin Pathian kohna dawngin ATC-ah Pathian thu B.Th. a zir ta a ni. Pastor hna a thawh hnu hian kum 2007-2008 chhungin ATC-ah bawk Bachelor of Divinity hi a zir leh a ni.
Rawngbawlna lam : Synod vawi 76-na, kum 2000-a Zarkawt Kohhrana neih chuan Pro. Pastor atan a la a, kum 2001-2003 chhung Kawnpui bialah Pro. Pastor hna a thawk a, Pastor atana nemngheh a nih hnuah kum 2004-2006 chhung Pukzing bial a vawng a, kum 2007-2008 chhung khan Aizawl Theological College-ah BD zir zawm lehin kum 2009-2013 chhung khan Suangpuilawn Bialah Pastor-a awm lehin, chumi hnu kum 2014-2018 khan Buarpui bial Pastor ni lehin kum 2019 khan Champhai Bethel bial vawng tura ruat a nih angin a thih ni thlengin he bialah hian Pastor hna hi a thawk a ni.
Rev. F. Lalrinawma hian rawng a bawl chhung hian Bial Chairman nihna te, Presbytery Moderator nihna te a chelh a, heng bakah hian Synod Committee peng hrang hrangah a thu bawk. Hetiangin :
1. Synod Pastoral Committee : 2009-2011, 2012-2013
2. Synod Sunday School Committee : 2014-2015
3. Synod Executive Committee : 2016-2018
4. Synod Mission Board : 2019-2021, 2022
A hun hnuhnung : Ni 3.1.2023 tukthuan eikhamah Quarters kawtah a motor a sil a, motor sil pahin tui a pump bawk a. A tui pump a khah leh khah loh a han en zo a, a chhuk lam chu step chanve vel atangin a tla thla ta a ni. Vanduaithlak takin a lu a sawh a, Champhai District Hospital panpui a ni a, a hliam tuar lovin a boral ta a ni.
Champhai damdawi inah Post Mortem tih a nih hnuin Pastor Quarters-ah lak thlak a ni a, Kohhran Hall-ah Bialin thlahna hun an hmang leh a. A ruang hi anmahni khua Khumtungah rawn phurh thlak a ni ta a ni.
Rev. F. Lalrinawma hi naupan lai atanga Pathian tih mi leh tawngtai ngaipawimawh mi tak mai a ni a, College-a kal lai pawhin mite ngainat hlawh tak a ni a. Mi tlawmngaithei tak leh mi inngaitlawm tak a ni.
Pastor rawngbawl hna a thawh hnuah pawh a theihna zawng zawnga rawngbawl thin a ni a, a rawngbawlpuite leh Kohhranho ten an nelin an ngaina thin hle a ni.