Vawiin (Jan. 16, 2023) khan Synod Hospital, Durtlanga Audiology and Speech Laboratory chu Rev. V.L. Luaia Hranleh, Executive Secretary i/c Hospital, Mizoram Presbyterian Kohhran chuan hawngin Pathian hnenah a hlan. He hun hi Synod Hospital Director Dr. Lalthakima’n kaihruaiin Dr. Samuel Lalhruaitluanga, ENT Surgeon hnen atangin Technical Report ngaihthlak a ni.
Audiology and Speech Laboratory Room chhungah hian damlo awmna tur pindan hrang awmin a bangah Acoustic Board Fiber Wool material hmanga bel vek a ni a, a kawngkharah double door WPC panel hman a ni bawk. He Laboratory thar hi Synod Hospital, Durtlang leh CBM India tangkawpin an siam a ni.
Audiology and Speech Laboratory Room changtlung tak hian hmasawnna tam tak a keng tel a.Hearing Test (Ri hriatna endikna) reng reng a rintlak leh zual dawn a ni. BERA (Ri hriatna endikna khawl tha ber), luhai pawh endik theihna (ECOG) keng tel nghal pawh mumal takin Synod Hospital, Durtlang chuan an hmang thei nghal dawn a, Nausen piang hlim atanga kum upa te tan Hearing Test tih theih a ni dawn a ni. Hei bakah hian Speech Assessment (Tawng lama harsatna nei endikna) leh Swallowing Assessment (Thil lem harsatna neite endikna) te mumal takin kal pui theih a ni tawh dawn a ni.
Synod Hospital ENT Unit hi tun hnaiah nasa zawka cheithat niin OPD Room, khawl changtlung taka thuam pawh hman chhoh mek zel a ni a, tunah hian ENT Specialist pahnih leh Audiologist-in an enkawl mek a ni.
