Vawiin (Jan. 24, 2023) chawhma dar 10:30 khan Mizorama Kohhran Inpumkhatna chungchanga inrawnkhawmna, Sap Upa leh Pu Buanga Hall, BCM Headquarters Office, Serkawn, Lunglei-ah neih a ni.
He inrawnkhawmna hun hi Rev. Dr. C. Chawnghmingliana, Synod Moderator, Mizoram Presbyterian Church-in a kaihruai a, chibai bukna leh inlawmna te leh inhmelhriattirna te neih anih hnuah Kohhran inpumkhatna tur atana thil pawimawh hrang hrang sawiho nghal a ni. Thu ngaihtuah zingah - Eng ang inpumkhatna nge kan duh tih chungchang te, inpumkhatna pawl hming tur chungchang te, Steering committee din rawtna te, Drafting committee din rawtna te hi a langsar zual te an ni.
Inrawnkhawmna chuan Church Council din tha an ti a. A ruangam lo duang turin Drafting Committee hetiang hian siam a ni :
Mizoram Presbyterian Church (MPC) atangin Rev. Dr. K. Lallawmzuala, Executive Secretary leh Rev. Dr. Lalhmangaiha
Baptist Church of Mizoram (BCM) atangin Rev. K.V. Thanga leh Rev. R. Lalnunzira
Lairam Isua Krista Baptist Kohhran (LIKBK) atangin Rev. Dr. L.H. Lalpekhlua leh Rev. Th. Vanlalzauva
Evangelical Church of Maraland (ECM) atangin Rev. P. Riabi leh Senior Executive Secretary ni lai
Salvation Army atangin Lt. Colonel Lalhriatpuia leh Lt. Colonel Lalramliana Hnamte, te an ni a, May 19, 2023-ah a draft thlirho tura meeting neih leh tur a ni a, Aizawlah Salvation Army-ten an thleng ang.
He inrawnkhawmnaah hian Mizoram Presbyterian Church atangin Rev. Dr. C. Chawnghmingliana, Moderator; Rev. V.L. Luaia Hranleh, Executive Secretary; Rev. Dr. K. Lallawmzuala, Executive Secretary; Rev. P.C. Pachhunga, Finance Officer-te bakah Rev. H. Remthanga leh Rev. Dr. Lalhmangaiha-te an kal. Evangelical Church of Maraland (ECM) atangin Rev. Dr. F.C. Beichho hovin mi 4 an kal a, Salvation Army atangin Commissioner Lalkiamlova hovin mi 6 an kal a, Lairam Isua Krista Baptist Kohhran (LIKBK) atangin Rev. T.C. Lalsanghmuna, Assembly Chairman Elect hovin mi 6 an kal a, Baptist Church of Mizoram atangin Rev. K.V. Thanga, President Elect hovin mi 8 an kal bawk.
Synod 2015 General 1-na chuan “Mizoram Kohhrante inpumkhatna kawng zawn” tha a ti a. SEC bawhzui atan a dah a. Hemi thu bawhzuina kal zelah Missionary din kohhran-te – PCI, BCM, ECM leh LIKBK te inbiakpui phawt a, a tul ang zelin kohhran pawl dangte pawh sawm khawm zel ila, tih a ni a. Hemi chungchangah hian Kohhran hruaitute inrawnkhawm rawt a ni a, Salvation Army pawh sawm tel tha tih tlan a ni a. Tichuan, PCI, BCM, ECM, LIKBK leh Salvation Army hruaitute nen Kohhran Inpumkhatna leh thawhhona, Church Council din chungchang inrawnkhawmna hun hi hman a ni ta a ni.