February 5, 2023 (Pathianni) chawhnu dar 1:30 hian Mission Vengthlang Kohhran Biak In-ah Synod Mission Board hnuaia thawk tur Missionary Tirh chhuah inkhawm neih a ni ang.
Tirh chhuah inkhawm hi Synod Mission Board Secretary Rev. R. Lalhmingsanga'n a kaihruai ang a, Upa Lalthahluna Ralte, Coordinator, Synod Mission Board-in Missionary tirh chhuahte inhmelhriattirna a nei ang a, Rev. Dr. C. Chawnghmingliana, Synod Moderator-in tirh chhuahna hun hmangin thuchah a sawi ang. Tirh chhuahte atangin thusawi tawi ngaihthlak a ni bawk ang a. Rev. Dr. K. Lallawmzuala, Executive Secretary i/c Mission-in tawngtaisakna hun a hmang ang. He hunah hian Synod Choir, Synod Mission Choir leh Mission Vengthlang Bial Zaipawl te hnen atangin Pathian fakna hla ngaihthlak a ni ang a. Kum 2023-a Missionary pension-a chhuakte hnenah Upa B. Lalhmunliana, Synod Secretary-in Citation a hlan bawk ang.
Missionary tirh chhuah turte hi mipa 27 leh hmeichhia 22, an vaiin 49 an ni a. Evangelist Teacher - 22, Evangelist - 21, Medical - 4 leh Craft Teacher - 2 an ni. January 9 - February 3, 2023 chhung khan Missionary Training College (MTC), Mission Vengthlangah Pre-Service Orientation Training an lo nei tawh a. Orientation training-ah hian an awmna tur chanchin te, rawngbawl dan tur kal hmang te leh thil pawimawh hrang hrang te an zir a. Tirh chhuah an nih hnu hian an awmna tur hmun theuh an pan tawh ang.
Tirh chhuah inkhawm hi Hruaina Eng TV Channel leh Synfo Youtube channel - Synod Information-ah LIVE Telecast tura ruahman a ni.