Mizoram Presbyterian Kohhran hnuaia Synod Committee sang, Synod Executive Committee vawi 301-na chu February 21-23, 2023 chhung hian an thu mek.
Meeting hi Synod Moderator, Rev. Dr. C. Chawnghminglianan a kaihruai a, thu ngaihtuah tur 50 chuang chhawp chhuah a ni. Upa B. Lalhmunliana, Synod Secretary (Sr)-in report a pe a, Rev. V.L. Luaia Hranleh, Finance Officer-in report a pe bawk a. Rel tura chhawp chhuah zingah nikum 2022 Synod thu dah - Corruption do leh a kaihhnawih chungchang te, ram hruaitute khalh ngil tura Synod-in chak zawka hma a lak dan tur chungchang te, Land reforms leh land ceiling chungchang te, Politics siam tha tura hmalakna chungchang te, Mizoram Assembly inthlanpui atana tawngtairual chungchang te chu a langsar zual a ni. SEC thut khawm hian ni thum a awh ang.
