Vawiin (March 9, 2023) hian Presbyterian English School (PES) Principals’ Meet Synod Conference Centre-ah neih a ni a, PES 157 atangin Principal 104 an tel thei.
HSLC Exam lai anih avangin exam centre-a mawhphurhna chelhtu thenkhat bakah rawngbawlna tul dang avangin Principal thenkhat an tel thei lo a ni.
Programme hi session thumah thenin, session khatna hi Rev. Dr. K. Lallawmzuala, Executive Secretary incharge Education-in a kaihruai a, Rev. R. Lalchangliana, committee member-in hunserh a hmang. Resource Person Upa P.C. Vanlalhruaia paper buatsaih ‘Awareness, uniqueness of PES and Suggestive Best Practice’ tih thupui zirho a ni a, One in Christ an zai bawk. Session hnihna hi Pi Zirkungi, Principal Synod Higher Secondary School leh Education Board Secretary-in a kaihruai a, Resource Person Pu Lalvena Hnamte paper buatsaih ‘Role and functions of school Principals’ tih thupui zirho a ni. Session thumna Upa Dr. Laithanzauva, committee member-in a kaihruai a, sawihona hun hman a ni.
PES-ah hian tun academic session kal mekah zirlai 33,522 an awm a, heng zirlaite hian thiamna lama chak zawka hma an sawn theihna tur leh kaihhruaina tha an dawn theihna tur a nih beiseiin he Principals’ Meet hi buatsaih a ni.
