March 10-12, 2023 chhung hian Presbyterian Kohhran Hmeichhe Inkhawmpui Lian, vawi 50-na chu GSA Playground, Darlawnah neih a ni ang. 

Inkhawmpui thupui "Pathian nena len dun" tih chu Speaker Rev. V.L. Luaia Hranleh, Executive Secretary i/c Kohhran Hmeichhia-in a sawi ang.

Zanin (March 10, 2023) hian Palai lawmna leh Report inkhawm neih a ni ang a, Pi Vanlalhruaii, Vice Chairman-in Pathian thuchah a sawi ang a, March 11, 2023 (Inrinni) nilengin Darlawn Kohhran Biak Inah Rorel a ni ang. Rorel hlan hian Pandal-ah inkhawm neih a ni ang a, chawhmaah Pi Saithangpuii Sailo, Evangelist, Borapansuri-in Pathian thuchah a sawi ang a, chawhnuah Thu zir inkhawm a awm ang a, Pi C. Januari, Ramhlun South-in Nehemia Bu atangin Pathian thu a zirtir ang. Zan Pathian Biak inkhawmah Rev. Dr. C. Chawnghmingliana, Synod Moderator-in Pathian thuchah a sawi ang. 

March 12, 2023 (Pathianni) chawhma leh chawhnu inkhawmah Inkhawmpui Lian Speaker Rev. V.L. Luaia Hranleh-in thupui a sawi ang a, chawhma inkhawmah hian Kristian Chhungkaw dinhmun tehna 'No Mawi' hlan a ni bawk ang. Zan Pathian Biak inkhawmah Pi Sailuti, Chairman-in Pathian thuchah a sawi ang.

---------------------------------------------------------------------------------------------------

March 10-12, 2023 chhung khan Kohhran Hmeichhe Inkhawmpui Lian, vawi 50-na chu Darlawn GSA Playground-ah Pathian hruainain tluang taka neih a ni a, Pastor bial pahnih, Darlawn bial leh Darlawn Venghlun bialten an thleng a, Rorel Palai 894 an kal.

Inkhawmpui Lian thupui "Pathian nena len dun" tih chu, Speaker Rev. V.L. Luaia Hranleh, Executive Secretary i/c Kohhran Hmeichhia-in Pathianni chawhma leh chawhnuah te a sawi a ni. Chhinchhiah chinah, Inkhawmpui Lian Palai kal hi mi 10,077 an awm a, lirthei chi hrang hrang Bus 237, Sumo 349, Car 131, Pickup 106 hmangin inkhawmpui lian palaite an kal a ni.

Inkhawmpui rorel tlangpuite:
1. Synod Hospital Charity Fund atan vawi khat inkhawm thawhlawm lak khawm.
2. Social media-a mawi lo taka hmeichhia inlan thin lo tura inzirtir.
3. Ram pum huapin hmeichhiaten puan bih uar tura inzirtir.
4. Pathian biak inkhawm uar tura inzirtir.
5. Nula, tlangval leh tleirawlte enkawlna kawngah ram pum huapa inzirtir.
6. Ruihhlo leh mipat hmeichhiatna hman sualna laka tu leh fate an fihlim theih nana ram pum huapa hmalak. 

Inchhiarna lam - Bial leh Kohhran mal zawmtu 216 an awm a, Kohhran leh Branch Church zat 976 an awm bawk. Chhungkua zawng zawng zat- 1,17,455 a ni a, Ni tin chhung inkhawm nei thei chhungkua 81,030(68.83%) awmin, Buhfaitham tham ziah chhungkua 1,16,012 (98.54%) an awm bawk. Kohhran Hmeichhe member hi 1,92,490 an awm a ni.

Kristian chhungkaw dinhmun tehna pakhatna chu N. E. Khawdungsei leh Phainuam bial te an ni. Nitin chhung inkhawm nei thei hi 100% an ni a, chhungkua 100%-in buhfai\ham an \ham bawk a ni.

Kum 2023 atanga 2025 chhunga Central Kohhran Hmeichhe Office Bearer-te chu :
Chairman - Pi Zothanpari (SEC ruat)
Vice Chairman - Dr. Lalthansangi Fanai
General Secretary - Pi H. Lalfakmawii (SEC ruat)
Asst. Secretary - Pi Lalmuanzuali
Treasurer - Pi Zothansiami
Fin. Secretary - Pi R. Lalrempuii

Anni bakah hian committee member 36 leh Ex-Officio 4 an awm.