Nimin (March 15, 2023) khan Mizorama Chanchin Tha thlen Ni champha chu Kohhran hrang hrangah hman niin special programme-a hman a ni a, Synod Office pawh khar a ni. Kohhran tam ber chu hemi ni pual hian zan lamah an inkhawm a ni.
Mizorama Chanchin Tha thlen ni atana kan hman tak, March 15 hi Mizorama Chanchin Tha rawn puang hmasa bertu Rev. William Williams-an Mizoram a rawn thlen ni champha a ni. Rev. William Williams-a hi Khasi rama Welsh missionary a ni a, Mizote chanchin a hriatin Mizote zinga Chanchin Tha hril a duh hle a, Mizote zingah missionary ni tura a lo kal thei lo chungin Mizoram tlawh hram a tum a, Silchar DC remruatpuinain Sipaiho ruala lo kalin Mizoram a rawn lut a, a hmasa ber atan Mizote zingah Krista Chanchin Tha a rawn puang ta a. Rev. William Williams-a'n Mizoram a rawn thlen ni hi Mizoram Presbyterian Kohhran chuan Mizorama Chanchin Tha lo thlen ni atan a hmang ta a ni.