Synod Revival Speaker-te tana buatsaih Intuaitharna hun chu March ni 21 - 24, 2023 chhung hian Synod Conference Centre-ah riakluta neih a ni a, Revival Speaker-te an kal kim thei a ni.
Intuaitharna programme hi March ni 21, 2023 (Thawhlehni) zan khan hawnna inkhawm neih a ni a, Synod Moderator Rev. Dr. C. Chawnghminglianan Keynote Address a sawi a, Gospel Zochhuanmawii leh Bunthar Veng Bial Zaipawl te an zai bawk.
Intuaitharna hun an hman chhung hian Revival Speaker-ten an rawngbawl zelna tur atana pawimawh thupui chi hrang hrang - Pathian thu hril dan tha, Tunlai Khawvel leh Kohhran, Rawngbawltu Fimkhurna tur te leh Kohhran Humhalh chungchang te zir ho a ni a, heng thupui te hi mithiam hrang hrangten an zirtir thin a, sawihona neih thin a ni bawk.
March ni 23, 2023 (Ningani) zanah kharna inkhawm neih a ni ang a, March ni 24, 2023 (Zirtawpni) tukthuan eikhamah an chhuak leh ang.
Tun dinhmunah Synod Revival Speaker 69 (mipa 67 leh hmeichhia 2) an awm mek a, Synod Revival Speaker-te puala riak luta Intuaitharna hun hi harsatna dang a awm anih loh chuan kum tina neih thin a ni.