India ram Presbyterian Kohhran (PCI) hnuaia thalai pawl Presbyterian Youth Fellowship (PYF) Biennial Conference Vawi 24-na chu Champhai Vengthlang Kohhran Biak Inah, April ni 28-30, 2023 chhung khan neih a ni a, Conference thupui chu “Amah a rinawm si a” (For His Faithfulness) tih a ni.
PYF hnuaiah hian Unit 14 an awm mek a, heng Unit hrang hrang 14-ah hian member 3,24,586 an awm mek a ni. Biennial Conference-ah hian Unit tin member zat azirin palai intirh theih zat bituk a ni a, KTP hian member ngah berin, palai 125 an intir thei a, tun tumah hian CKTP Committee - mi 28, Mizoram Synod Choir - mi 25 leh Bial hrang hrang aiawh - mi 72 an palai a ni.
Zirtawpni zan, Inrinni zan leh Pathianni nilengin Vantlang Pathian Biak Inkhawm neih a ni a, Inrinni zingkarah Devotion neih niin, Pathianni zingkarah Lalpa Zanriah Sakramen buatsaih a ni, inrinni nilengin Rorel Inkhawm neih a ni thung. Conference-ah hian Speaker pathum an awm a, inrinni zanah Rev. Remsiama Ngamlai, Biateram Synod-in thupui a sawi a, Pathianni chawhmaah Rev. Dr. L.H. Rawsea, Mizoram Synod-in sawiin Pathianni chawhnuah Rev. B. Syiem, KJP Synod Sepngi-in a sawi veleh a ni. Inkhawm apiangin Synod hrang hrang Zaipawl tha tak tak ngaihthlak thin a ni. Inrinni zan leh Pathianni zan inkhawm banah Variety Programme hman a ni bawk. Inrinni rorel inkhawmah thil hrang hrang rel a ni a, kum 2023-2024 PYF Budget atan Rs. 6,34,060/- chu pawm a ni.
Kum 2023-2025 PYF hruaitu turte :
Leader : Rev. S.C. Diengngan, KJP Sepngi
Assistant Leader : Mr. Bharat Jeme, PYF CHT Synod
Secretary : Rev. K. Laloo, JSKJP Mihngi
Assistant Secretary : Miss F. Lallianzuali, KTP Mizoram Synod
Treasurer : Dr. Miss Crucybeljune Kharbani, JSKJP Sepngi
Committee Member-ah KTP atangin Pu C. Lalkhawngaiha a tel a, Editorial Board-ah Tv. P.C. Lalthanmawia a tel bawk.
Kum 2025 PYF Biennial Conference hi JS KJP Mihngi-in a thleng ang.
For more Click Here