May 3 & 4, 2023 khan MSSU buatsaihin Bial Sunday School Secretary-te tan Biennial Secretarial Training vawi 18-na chu Aizawl Theological College, Durtlang-ah neih a ni.
May 3 zanah hawnna inkhawm neih niin Rev. V.L. Luaia Hranleh, Executive Secretary i/c MSSU-in a kaihhruai a, Rev. Dr. C. Chawnghmingliana, Synod Moderator-in hawnna neiin thuchah a sawi a, Moderator chuan, Sunday School rawngbawlnaa ruat bik lote tan chuan thahnemngaia thawh ve ngawt theih a ni lo thu leh heng rawngbawlna chanvo chelhtute vanneih bikzia leh chumi avanga thahnem ngai taka thawk turin a fuih a ni.
MSSU Secretarial Training hi Bial Sunday School Secretary ruat thar kum apianga neih thin a ni a, Secretary hna leh an rawngbawlna atana thil pawimawh hrang hrangte inzirtirna hun atan hman thin a ni. Kum 1974 atanga kum thum dan zela neih thin chu kum 2018 Synod-in Bial Sunday School Secretary term kum hniha a bithliah tak avangin 2019 atangin kum hnih dan zelah neih thin a ni. Tun tum Secretarial Training-ah hian Bial Sunday School Secretary 181 an tel thei a, an zingah hian hmeichhia 1 a awm a ni.
May 4, 2023 (Ningani) zan khan a kharna hun hman a ni a, kharna inkhawm hi Upa B. Lalhmunliana, Synod Secretary-in a kaihruai a, Rev. V.L. Luaia Hranleh, Executive Secretary-in fuihna sawiin training chhuakte hnenah Certificate a hlan a ni.
For more pics Click Here