May 10, 2023 (Nilaini) hian Mizoram Presbyterian Kohhran hnuaia Pastoral rawngbawlna lam ngaihtuahtu, Synod Pastoral Committee chu J.M. Lloyd Hall, Synod Office-ah an thu a, Aizawl chhung atangin 32 leh Aizawl pawn atangin 83, an vaiin member 115 an kal.
Meeting hi Synod Moderator Rev. Dr. C. Chawnghmingliana'n a kaihruai a, Upa B. Lalhmunliana, Synod Secretary-in report a pe. Report-ah hian, Champhai Bethel bialtu Rev. F. Lalrinawma a thih tak avanga December, 2023 thlenga Champhai Bethel Bial enkawl tura Rev. Rualthankhuma ruat a nih thu te, Masihi Sangati (Kawl) Pastor Rev. Lalsawichhunga a thih tak avanga Kawl Pastor thar atan Rev. Dr. Vanlalhnema ruat a nih thu te, OM ruahman anga Pastor 80 leh Pro. Pastor 28 lai an awmna thar tura dah ngheh an nih thu te, Barak Area-a Cachar Kahrawt Kohhran tih thin chu Kahrawt kohhran tih leh Cachar Kahrawt Bial tih thin pawh Kahrawt Pastor Bial tia thlak a nih thu te chu a langsar zual a ni.
Tun tum Pastoral Committee-ah hian Pastor zirna sang zawk zir dil leh te chungchang leh thil pawimawh dangte an ngaihtuah a ni.