Mizoram Synod, Family Guidance & Counselling Centre (FG&CC) in May 5 - 12, 2023 chhunga Church Leaders' Pastoral Care & Counselling Training vawi 36-na, Synod Conference Centre-a a buatsaih chu May 12, 2023 zanah ‘Final Evaluation & Graduation Service’ neiin khar a ni. He Counselling Training-ah hian Pastor Bial 8 atangin Kohhran aiawh mi 29 training-ah hian an tel a ni.
Training kharna inkhawm hi Rev. Lalsangbera, Director, FG&CC-in a kaihhruai a, He hun hmanpuitu Rev. C. Chawnghmingliana, Synod Moderator chuan Training chhuakte hnenah Certificate semin thuchah a sawi a, Counselling chu mi tin mamawh a nih avangin Pathian chakna rinchhana mi dangte harsatna sutkianpuitu nih tum zel tura fuihin an thil zirte chu midang te tana tangkai taka hmang turin a chah a ni.
Training kharna inkhawmah hian Training chhuakte chuan an hlawkpui dan a lema an ziak chu entirin an hrilhfiah a, Upa H. Lalnuntluanga, Kawrthah South chuan training chhuakte aiawhin thu a sawi a. Synod Mission Choir te tum hnih zaiin, FG&CC Com. Member zinga mi Rev. R. Lallianpara'n Training chhuakte a tawngtaisak a ni.
FG&CC hian Pastor leh Kohhrana rawngbawltu pawimawh (Church Leader)-te pualin Counselling Training buatsaih thin a ni. Pastor-te pual hian kum 1992 atang khan buatsaih thinin Pastor 535 training chhuak an awm tawh a. Tin, Church Leader te pualin kum 2002 atang khan vawi 36 buatsaih tawhin mi 811 Training chhuak an awm tawh bawk a ni.
Synod hian Counselling Centre pakua - Mission Veng, Bawngkawn, Vaivakawn, Champhai, Serchhip, Kolasib, Lunglei, Mamit leh Khawzawlah te a nei a. Heng Counselling Centre pakuaah hian May 4, 2023 thleng a pantu (client) an neih tawh zat chu 52,955 a ni a, kumin 2023 bikah mi 2,259 an nei tawh a ni.