Nizan (May 18, 2023) atang khan Synod Mission Board buatsaihin Central Region Missionary Retreat vawi 4-na, Chaltlang Kohhranah neih a ni a, May 21, 2023 (Pathianni) zanah a tiak ang. 

Retreat thupui 'Krista hmangaihna chuan min tir lui a ni' tih chu Retreat Speaker, Rev. Dr. K. Lallawmzuala, Executive Secretary-in a sawi ang. 

Nizan (May 18, 2023) khan vantlang Pathian Biak Inkhawm neih a ni a. Inkhawm hi Rev. R. Lalhmingsanga, Mission Board Secretary-in a kaihruai a, Synod Moderator Rev. Dr. C. Chawnghmingliana'n Keynote Address a sawi. 

May 19, 2023 (Zirtawpni) hian nilengin ‘Tunlai India rama rawngbawl dan tur pawimawhte’ tih thupui hmanga Rev. Dr. Hmingthansanga, Director, Church Relation, Partnership and Networking, Interserve, India paper buatsaih zir ho a ni ang a, zan inkhawmah Rev. C. Zorammawia, Senior Executive Secretary-in Pathian thuchah a sawi ang. Zan inkhawm banah hian Kohhran Centenary Hall-ah Zaikhawm a ni ang.  

May 20, 2023 (Inrinni) hian nilengin Fakna Inkhawm, Kohhran Centenary Hall-ah neih a ni ang. Zan inkhawmah retreat thupui hmangin Speaker, Rev. Dr. K. Lallawmzuala’n thuchah a sawi ang a, inkhawm banah hian Kohhran Centenary Hall-ah Zaikhawm leh a ni ang.

May 21, 2023 (Pathianni) chawhma leh chawhnuah Speaker, Rev. Dr. K. Lallawmzuala hnen atangin Pathian thuchah ngaihthlak leh a ni ang. Chawhnu inkhawmah hian Missionary chatuan ram pan tate mi 21 sunna hun hman nghal a ni ang. Zan inkhawmah Rev. R. Lalhmingsanga, Synod Mission Board Secretary-in Pathian thuchah a sawi ang a, inkhawm banah Kohhran Centenary Hall-ah Zaikhawm a awm leh ang.

Retreat-ah hian Central Region-a Mission Field 8 leh Partnership-a Missionary-te, Cambodia leh India ram lailia kan Missionary-te leh an chhungte mi 599 an kal thei a. Palai riaklut hi mi 514 awmin, langa kal mi 85 an awm a ni.