Presbyterian Church of India, Mizoram Synod hnuaia Pastor Retreat chu May 23-26, 2023 chhung hian Aizawl Theological College, Durtlangah neih a ni a, Mizoram Synod hnuaia thawk mek, Pastor leh Minister-te bakah Pensioner mi 497 an tel a ni. Retreat tan zan hian Synod Moderator Rev. Dr. C. Chawnghmingliana’n inlawmna thu leh Keynote Address a sawi.
May 24, 2023 (Nilaini) zing dar 7:00-ah Sermon inkhawm neih a ni a, Rev. R. Lalrosiaman thuchah a sawi a. Chawhma session-ah 'Inpumkhatna awmzia leh pawimawhna' tih thupui chu Rev. Dr. C. Lalramchhanan a sawi a. Chawhnu session-ah 'Inpumkhatna - Mizoram Presbyterian Pastor-te mamawh' tih thupui chu Rev. Dr. H. Lalrinthangan a sawi a. Zanah 'Pastor-te leh Taksa hriselna vawn' tih thupui Rev. Dr. K. Lallawmzualan a sawi a ni.
May 25, 2023 (Ningani) zingkar Sermon inkhawmah Rev. V.L. Luaia Hranleh-in thuchah a sawi a. Chawhma session-ah 'Kohhran Chhungkaw Inpumkhatna tura Pastor mawhphurhna' tih thupui Rev. K. Rolungmuanan a sawi a. Chawhnu session-ah 'Pastor-te hriat atana thil pawimawhte' tih thupui Rev. Zothansangan a sawi a, zawhna leh chhanna (General Discussion) hun hman a ni bawk. Zanah inthlahna hun hman a ni ang a, Rev. C. Zorammawia, Senior Executive Secretary-in thuchah a sawi ang. Retreat hi Zirtawpni zing dar 8:00-ah a tiak ang.
Pastor Retreat hi kum 1967 atanga hman thin a ni a. Kum 1990 atangin kum khat kâr danah neih a ni a. Pastor te tan intuaitharna hun pawimawh a nih avangin Pastor leh Pensioner ten an ngai pawimawh thin hle a ni.
