Synod Bookroom chuan kum tina an lo tih thin angin vawiin (May 25, 2023) khan Synod Bookroom Conference 2023 chu Synod Office Committee Room No. 2-ah an hmang a, Mizoram puma Synod Bookroom zawng zawng hei vang hian khar a ni.
Pu Lalniliana, Manager, Synod Bookroom chuan chawhma hun kaihruaiin inlawmna thu a sawi a. Pi Rosy Lalhmingmawii, Accountant-in Bookroom sum dinhmun report a pe a. Report atanga a lan danin kum kal ta khan Synod Bookroom hian nasa takin hma a sawn a. An budget ` 14,40,00,000/- chu tha taka khumin ` 21,97,27,814/- zet thawh chhuah a ni a, Synod Bookroom 1911-a din a nih atangin kum khata a thawh chhuah tam ber tum a la ni. Pathian awmpuina leh Kohhran mipuite thahnemngaihna azara hetiang dinhmun an thleng thei hi Synod Bookroom chuan lawmthu a sawi a ni. Chawhma hunah vek hian Upa H. Ronghaka, General Manager, PRESCOM chuan kum hmasa Bookroom Conference-a thurelte bawhzui a nih dan leh tihhlawhtlin a nih dan chi hrang hrang report a pe bawk.
Chawhnu hun chu Upa H. Ronghaka, General Manager-in kaihruaiin Mizoram puma Branch hrang hrangte atangin report leh rawtnate ngaihthlak a ni a. Kum kaltaa Bookroom rawngbawlna hrang hrang thlirletna leh sawizauna neih a ni a. Pu Lalniliana Manager, Synod Bookroom-in Monthly Operation Review khaikhawmna a nei bawk.
Hemi hnu hian kum kaltaa Synod Bookroom Branch tha thlanna result puan niin Upa B. Lalhmunliana, Synod Secretary chuan Branch ti thate hnenah lawmman a sem a. Tehna ki hrang hrang palia inteh a nih hnuah hetiang hi kum 2022-23 chhunga Synod Bookroom Branch tha lawmman dawngte chu an ni:-
Pakhatna : Synod Bookroom Chanmari Branch, Aizawl
Pahnihna : Synod Bookroom Churachanpur Branch, Manipur
Pathumna : Synod Bookroom Mamit Branch
Tun dinhmunah Synod Bookroom hian Branch 16 neiin Distribution Centre 48 a nei mek a ni.