Synod Multipurpose Training Centre (SMTC) buatsaih Lay Leaders’ Residential Training vawi 220-na chu nizan (May 30, 2023) khan neih tan a ni.
Training hawnna inkhawm hi SMTC Hall-ah neih niin Rev. Lalrinthara, Programme Director-in programme a kaihruai a. Rev. K Lalthanliana, Mission Vengthlang Bialtu Pastor-in hawnna leh thuchah a sawi a, Pi Liandingpuii’n zaia rawngbâwlna a nei a. Rev. Vanlalzuata’n malsâwmnain hun a khâr a ni.
Tun tumah hian Presbytery 7 - Aizawl Chhim, Serlui, Teirei, Tuipuiral, Tuirini, Zoram Pawn leh Aizawl Chhimthlang Presbytery atangin Kohhran Upa 40, kum 2019 leh a hma lama mite bâkah 2020 kuma nemngheh mi 4-te koh an ni. Training-ah hian Resource person atan Rev. Vanlalzuata, Rev. Thangzauva, Rev. K Lalpiangthara leh Rev. Lalrinthara te an hmang ang.
Training kharna hi June 2, 2023 zanah neih a ni ang a, Rev. V.L. Luaia Hranleh, Executive Secretary i/c SMTC-in a khârna thuchah leh Trainee-te hnêna Certificate hlanna a nei ang a, trainee-te tâna tawngtaisakna Rev. Vanlalzuata’n a nei ang a, Trainee-te aiawhin Upa Lalrinawma, Thakthing Veng Kohhranin thu a sawi ang a, Rev. Thangzauva’n SMTC aiawhin lawmthu a sawi bawk ang.
Synod Multipurpose Training Centre hi kum 1996-a hawn a ni a, a hawn kum atangin Lay Leaders’ Training -Kohhran Upate puala Training hi neih chhoh tan nghal a ni a. Tûnah a vawi 220-na neih mêk a ni a, heta Kohhran Upa training neih tawh zawng zawng zât chu mi 7148 an tling tawh a ni.
SMTC-ah hian Ministerial training hrang hrang kalpui thin a nih bakah Vocational training, kum tluanin kalpui thin a ni a, tunah hian Vocational training hnuaiah trade chi hrang hrang 5 nei mekin zirlai mi 83 an awm mek a ni.