July 3, 2023 (Thawhtanni) tlai dar 4:30 khan Synod OM leh Mizo People Convention (MPC) Hruaitute, Synod OM Room, Synod Office-ah inkawmhona an nei a. Tunlai Manipur buaina chungchang thil hrang hrang an sawiho va, member 12 an tel thei a ni.
Rev. V.L. Luaia Hranleh, Executive Secretary leh Finance Officer-in inkawmhona hi kaihruaiin tawngtaiin bul a tan a. Chumi zawhah Mizo People Convention hruaitute hnen atangin Mizo People Convention chungchang sawifiahna ngaithlak a ni.
MPC hi Manipura Mizote thawhhona tura pawl din a ni a. Hnam leh hnam inkara buaina a lo chhuah pawha ban phartu ber an ni thin. Remna leh muanna an duh ber a, chumi atan chuan nasa takin an thawk thin a. Manipur-a Zo hnahthlak hrang hrangte intelkhawmna Indigenous Tribal Leaders' Forum (ITLF) din a ni a. ITLF-ah hian department hrang hrang siam a ni a. Relief and Medical Department, Steering/Advisory Committee, Media lam changtu pawl, Volunteer/Defence, Legal Cell, Women Wing, Finance Department, Information and publicity, Intelligence Wing, leh Students Wing te an awm a. Manipur buai vanga tlanchhiate enkawl leh hliam tuarte enkawl hna hi Relief and Medical Department hian an thawk nasa hle a ni. Hetia ITLF ten hma an lak lai hian ITLF tirh ni lo, ITLF hminga vehbur lo khawn te lakah fimkhur thurin min chah nghal a. Mizo Synod chauh ni lo, N.E. India huap (NEICC) emaw, PCI General Assembly hming emawa aw neih a tangkai dan tur te sawi a ni. Mizo People Convention chuan demand an nei lo va, remna leh muanna awm se an duh ber thu an sawi bawk a. Manipur buaina tuar nasa ber berte chu Vaiphei leh Kuki an nih thu an sawi a. An awm zel dan tur atan thurawn an mamawh thu te sawiin, tanpuina pek dawnah pawh ILTF kaltlanga pek a that tur thu an sawi. Rev. P.C. Pachhunga, Finance Officer-in tawngtaiin hun a khar a ni.