OBITUARY : REV. C. VANLALRINGA (82)
July 14, 2023 | OBITUARY
Rev. C. Vanlalringa (kum 82), pensioner chu July 13, 2023 chawhma dar 11 khan a thi a, vawiin (July 14, 2023) chawhnu dar 1:00 hian Durtlang Kohhran Biak Inah Rev. Dr. Vanlalnghaka Ralte, Ex-Moderator, Mizoram Synod-in a vui ang.
Rev. C. Vanlalringa hi Pu Khuanglianthuama (L) leh Pauhrangi (L)-te inkarah Oct. 8, 1941 khan Leithûm khuaah a lo piang a, unau hi pakhat a nei a. A pa hian a thihsan hma avangin a nu hian a nutate a belhpui a ni.
Zirna lam
Primary School hi Leithûmah a zir a, Middle School hi Vanzauah zirin, Second Division-ah a pass a. High School erawh Aizawlah a zir zo thung. Kum 1958 April thlaah khawsik avanga damlova khuma a mut reng lain Pathian fa nihna thu leh a tana nung tur a nih thu hriattirna a dawng a. Heta tang hian Pathian tana dam chhunga nun hmang tur a nihzia a lo inhre ta a. Tichuan, Pathian thu zir duhna neiin, kum 1967 atanga 1970 chhungin Aizawl Theological College-ah Pathian thu a zir ta a ni.
Rawngbawlna
Kum 1970 Synod Inkhawmpui chuan Pro. Pastor atan a la a, Jan. 14, 1971 atangin Kolasib Bialah Pro. Pastor hna hi a thawk a, kum 1974 thlengin Kolasib-ah hian a awm.
Kum 1974 Synod Inkhawmpuiah nemngheh a ni a. Kum 1975 atangin Reiêk Bialah awm tanin, Reiêkah hian kum 1984 thleng a awm a; kum 1985 Jan. – Jun. thleng Khawlailung Bialah a awm leh a; Kum 1985 Jun. – Dec. chhungin Aizawl Theological College-ah B.Th. a zir a, a hriselnain a tlin loh avangin a chawlhsan a. Kum 1982-1992 chhungin Tlungvel Bialah a awm a, Durtlang Bialah kum 1993-2001 chhung a awm zui leh a, a pension ta a ni.
A rawngbawl chhung hian Bial Chairman vawi 15, Presbytery Moderator-ah vawi 3, Synod Executive Committee-ah term thum a awm a, Pastoral Committee-ah term 2, Synod Music Committee-ah term 1, Synod Hospital Board-ah term 1, Synod Sunday School Committee-ah term 1 leh Synod Social Front-ah term 1 chhung a thu bawk.
A pension hnuah, kum 2004 chhung khan Synod Rescue Home Director-in a thawk leh a, Synod Mission Board-ah term khat a awm lehin, Synod Pastoral Committee-ah term khat a thu bawk. Heng bakah hian Bible Society Campaign-in kohhran eng emaw zatah a kal bawk.
A mizia leh thil dang
Pathian leh a kohhran a hmangaih em em a; a theih ang tawkin kohhran a humhalh a. Zirtirna dik lo chu na takin a dodal thin. Kohhran mipui a ngaihsak a, a bialte ngainat a hlawh em em. Rawngbawlnaah a phâk tâwka theihtawp chhuah thin a ni a, a theih hram chuan chak lo tak a nih thleng pawha kohhran rorelna - Committee-ah pawh tel tum tlat mi a ni.
Pathian ram thawhlawm a ngai pawimawh em em reng a. Kum 1985 atanga vawiin thlengin sawma pahnih a la pe thin.
Rev. C. Vanlalringa hi chhung leh khatte a ngainaa kuah khawmtu tak a ni a, mize zawi, hmangaihna ngah tak, ngainatawm tak a ni a. Chhawmdawl ngai leh tanpui ngaite tanpui peih em em reng mi a ni a, mi dang tana inpe mi, a theihna kawng kawngah mite tanpuitu nih tum tlat mi leh mi dangte tana malsawmna nih tum hram hram mi a ni.
A hun hnuhnung
Rev. C. Vanlalringa hi rawngbawla a chhuah chhung hian taksa hrisel lohna hrang hrangin a tlakbuak thin a. A service chhung hian damdawi inah vawi tam tak a lût a. A pension hnu, kum 2017 khan a hnar chhung a cancer a ni tih hmuh chhuah a ni a; Kolkata te panpui a nih hnuah dam takin an rawn haw a. Kum 2021 khan Covid hri a kai ve leh a. Pathian zarah taksa chak lo tak chungin Covid hri pawh a tuar chhuak leh a. Amaherawhchu, hemi hnu atang hian a taksa a chak lo zual ta hle a ni.
Kumin, kum 2023 bul lam atang phei chuan a taksa a chak lo lehzual hle a, tlêma han harh deuh chang chu nei mah se, thawh harh peih loh châng a ngah ta hle a. June 11, 2023 (Pathianni) tlai zanriah ei khamah khan a lu a hai nasa zual a, Synod Hospital panpui nghal a ni a. June 12, 2023 chuan a oxygen level a hniam bakah, a BP te a tlahniam hle a, doctor-in ICU-a dah luh thuai a ngaih thu a sawi a. Synod Hospital-ah hian ICU a ruah mai loh avangin LRM Hospital, Ramhlun ICU-ah dah luh a ni a. Oxygen a kham khawp a hip theih loh avangin ventilator hmanga enkawl zui a ni a. ICU-a ventilator nen thla khat zet enkawl a nih hnuah July 13, 2023 (Ningani) chawhma dar 11:00-ah khan chatuan chawlhnaah min chawlhsan ta a ni.
VUINA PROGRAMME
Vui ni : Ni 14 July, 2023 (Zirtawpni) 1:00PM
Vuina hmun : Durtlang Kohhran Biak In
Vuitu : Rev. Dr. Vanlalnghaka Ralte, Ex-Moderator, Mizoram Synod
Chanchin sawi : Upa B. Lalhmunliana, Secretary (Sr.), Mizoram Synod
Thlamuanna thuchah : Rev. Dr. Vanlalnghaka Ralte, Ex-Moderator, Mizoram Synod
Tawngtaisakna : Rev. Dr. K. Lallawmzuala, Exe. Secy., Mizoram Synod
Zaipawl : Durtlang Kohhran Zaipawl
Hla sakho : “Ka Lal duhawm ka zahpui lo’ng” (KHB 189)
Malsawmna : Rev. PC Pachhunga, Finance Officer, Mizoram Synod
Thlanmual : Rev. Malsawmdawngliana, Bialtu Pastor, Durtlang Bial
