Synod Social Front chuan ram ngaw, nungcha leh tui hna humhalh chungchanga hma lak ho dan tur sawi hopui atan PHE Department, Pollution Control Board, Forest & Environment, CYMA leh Environmental N.G.O. sawm leh pakhat te sawmin August 4, 2023 (Zirtawpni) chawhma dar 11:00 khan Synod Office Committee Room-I-ah an thu khawm a. Department leh pawl aiawhte an kal tha hle.
He meeting hi Rev. V.L. Luaia Hranleh, Executive Secretary i/c Synod Social Front-in a kaihruai a, Synod Social Front Executive member 8 leh sawm bik mi 20-ten, ram ngaw, nungcha leh tui hna humhalh chungchanga hma lak ho dan tur kawng hrang hrang an sawi ho a, a tul anga la inrawn khawm zel pawh an tum.
Nungchate sa ei thin leh sa pel ching an la awm nual pawi an tihzia te, sairawkherh nena sava vehte pawh hmuh tur an la awm reng mai hmuh hrehawm an tihzia te, ram ngaw a chereu nasat tak em avanga tui hna kang chat awm ta teuh mai pawi an tihzia leh ram ngaw humhalh tul an tihzia te an sawi a. Tawih thei lo bawlhhlawh paih duhdahin a nghawng pawizia te sawiin, Environment humhalh pawimawhzia hi Sunday School-ah te, ni tin school-ah te, Kohhranah te uar taka inzirtir a tulzia te thahnem ngai takin an sawi.
He meeting-ah hian Forest Conservation Amendment Bill pawh sawi hovin, FCA Bill hi tha an tih loh thu leh an duh loh thu an sawi bawk.