A Tobul
Kum 1981 Synod Inkhawmpui chuan Synod Ramthar Board rawtna angin kum 1983-a Sapram (Wales) tlawh tura Mizo Gospel Team Synod-in buatsaih se tih chu a pawmpui a. A tihhlawhtlin dan chu Synod Executive Committee kutah dah a ni (Synod 1981 Gen. 45). Hemi bawhzui hian Synod Executive Committee chuan Leader Pu V.L. Zaithanga hruai turin an vaiin mi 18 kal tura tih ni se, a bak ngaihtuah ngai chu Officers’ Meeting-in lo bawhzui turin a dah ve lehchhawng a ni. (SEC 76:XLI of 5.2.1982).

Tichuan Officers’ Meeting thuchhuak chu SEC-ah thlen leh a ni a, zaipawl member 15 nei chu siam fel a ni ta. Conductor atana Pu C. Thansiama ruat a ni nghe nghe (SEC 77:13 of 2.4.1982). Pu C. Thansiama hian rokhawlhna a neih avangin a aiah SEC chuan Pu Rinzawna a ruat ve leh thung {SEC 87:3 (12) of 9.2.1983}

He zaipawl hi Synod din a ni a, a enkawltu pawh Synod bawk a ni a, K.T.P. a inrawlh lo niin a lang. Zaipawl nghet tura din pawh a ni lo va, 1983-a Sapram (Wales) fang tura din mai a ni nghe nghe. Kum 1983-ah chuan an zin thei ta lo va, 1984-ah an zin ta thung a ni.

He hun hmalamah hian Synod hnuaiah hian zaipawl a awm chho deuh reng tho mai. Kum 1929-a Sylhet (tuna Bangladesh) fan hnuah phei kha chuan Zaipawl hi a awm chho deuh reng a, kum 1933-ah Lahore (tuna Pakistan) an fan te, 1963 – 1964 inkara South India (Kerala) an fan te, 1971-a India khawpui hrang hrang an fante khan Mizo Zaipawl hming an pu deuh ber.

Kum 1972-ah khan Synod mission Board-in Ramthar Zaipawl a din ve thung a. 1972 leh 1973 chhung khan Manipur, Nagaland, Assam, Cachar phai leh Orissa te an fang. Kum 1975-ah Presbyterian Youth Fellowship (PYF) Inkhawmpui, Jowai-ah an zai leh bawk.

Hetih lai hian Zoram Evangelical Fellowship (ZEF) Standing Choir kha August 1973 khan a lo ding ve leh ta a. Kum 1976-a India ram an fan te, 1978 leh 1980-a Sapram an fante khan Zaipawl tha duhna rilru chu Kohhran miteah a tuh hle a ni.

Kristian Thalai Pawl-in Mizoram Synod Choir lo ni ta a din dan chu hetiang hian April ni 23, 1985-a thukhawm chuan hetiang hian an rel.

India Ram Fang Tur Zaipawl Din
Hemi thu a lo luh dan chu heti ang hi a ni. India rama mi hausa pakhatin thla thum chhung vel, India ram fang tura zaipawl member 20 – 30 emaw inbuatsaih tura Pastor Biaktluanga Pachuau kaltlanga a sawmna thu leh senso zawng zawng tum vek a inhuam thu nen hriat a ni a. Ngun takin kan ngaihtuah a. Rin tlaka pawm ngam tur niin kan ngai a. A hun thu sawi fiah chiah a ni lo va. Favang lam hun erawh chu niin a lang. Kal thei tura inbuatsaih nghal tha kan ti a.

Hemi chungchanga dawr chian ngai apiang Gen. Secy-in lo dawr chiang se la. Synod Executive Committee remtihna pawh lak ngei tulin kan hria a. Zaipawl hming atan pawh Mizo Gospel Team tih ngei tha kan ti a.

Zaipawl body siam turin heng mite hi kan ruat –
Pastor Lalbiaktluanga, Leader
Upa Lianzela, Assistant Leader
Upa K. Lalhmingliana, General Secretary
Upa Lalbiaktluanga, Finance Secretary
Pu Rinzawna, Treasurer
Rev. Lalsawma, Executive Secretary, i/c K.T.P
Pu Lalchungnunga, Assistant Secretary

Hetiang hi an thu ni mahse, an tum ang hian an zin leh theih tak loh avangin NEICC Youth Assembly, Jowai-ah October ni 24 – 27, 1985 khan an zu zai phawt a, a hnuah Lunglei lamah December ni 9 – 12, 1985 chhung khan zinin Chanmari Veng (Lunglei) Kohhran hawnnaah te an va zai ta zawk a ni.

A din chhan ber ‘India ram fanga zin’ kha a nih tak loah chuan Central K.T.P. Committee chuan a kal zel dan tur a ngaihtuah a, 1986 October thla thlenga ding zui zel rih tura tih an ni leh ta a ni. He Mizo Gospel Team hi Standing Choir ni tura an duh avangin June 1986 khan a member-te ruat thar leh an ni a, remchan zawkna avangin hemi tuma an ruat pawh hi November ni 18, 1986 khan siamthat leh a ni.

Mizo Gospel Team tih hming chu remchang lo deuha hriain thlak rawtna a awm a, Central K.T.P. chuan Synod Executive Committee-ah rawtna thlen ni se tiin an rel a. An rawt ang hian Synod Executive Committee November ni 3, 1989 a thukhawm chuan a pawm ta a ni.

Zaipawl hi a tirah chuan term nghet neia siam a ni chiah lo. A remchan ang angin Committee chuan a siam rem chho thin. 1991 March ni 6-a Central K.T.P. Committee chuan Central K.T.P. Committee term kalphung ang (Term khat hi kum hnih) zui tura a tih tak avangin Zaipawl te hian term mumal an lo nei ve ta a ni.
 
INKAIHHRUAINA
Mizoram Synod Choir (Synod Zaipawl) hi Mizoram Presbyterian Kohhran (Synod) huapa din a ni a. Zaipawl rawngbawlna ruahman leh a enkawl hna chu Central Kristian Thalai Pawl Committee kuta awm a ni. 

I. Hrilhfiahna
‘Zaipawl’ tih chu ‘Mizoram Synod Choir’ (Synod Zaipawl) tihna a ni.
‘Committee’ tih chu ‘Central Kristian Thalai Pawl Committee’ tihna a ni.
‘Director’ tih chu ‘Mizoram Synod Choir Director’ tihna a ni.
‘Conductor’ tih chu ‘Mizoram Synod Choir ‘Conductor’ tihna a ni.
‘Member’ tih chu ‘Mizoram Synod Choir Member’ tihna a ni.

II. Thil tumte
Kohhran hote zingah inpumkhatna leh thawhhona tha zawk a awm theih nan zaia rawngbawl.
Kohhran leh Bial Zaipawlte hmasawn zel tura zirtir leh chawh harh.
Mizoram Synod/ K.T.P. aiawha Mizoram pawn lam thlenga rawngbawl.
Fakna hla hmanga rawngbawl.

III. Member lak dan
Member-te chu Presbyterian kohhran mi, K.T.P. member an ni tur a ni.
Committee-in Aizawl khawpui huam chhung K.T.P. Branch atangin member a ruat thin ang.
Member awm zat tur chu Committee-in a bithliah thin ang.

IV. Term chungchang
Member te hi term khat atan zel lak an ni ang a, term khat hi kum 2 a ni ang.
Term 1 (khat) tih hian K.T.P. General Conference leh K.T.P. General Conference inkar a huam ang a. Amaherawhchu, member thar siam fel a nih hma chuan member hluite’n an kengkawh thin ang.
Committee-in tha a tih chuan member ngai pawh term leh atan a ruat nawn leh thei ang.

V. Member tihtawp theih dan
Member-in Kohhran thununna a tawhin.
Aizawl khawpui huam chhung atanga member pem emaw sawn chhuah a nihin.
Member (hmeichhia) in pasal a neihin.
Committee-in member ni zui chi lohva a ngaihin.
Committee Member a nihin.
Zaipawl term a tawpin.

VI. Zaipawl tihtawp chungchang
Zaipawl tihtawp chungchang chu Synod Executive Committee thuneihna a ni.

VII. Director
Zaipawl kaihruaia enkawl turin Committee atangin Zaipawl term zuiin ‘Director’ ruat thin a ni ang.

VIII. Conductor
Committee-in Zaipawl Conductor tur, rimawi lama mi thiam, mi zirtir thiam leh nunphungah pawh mi entawn tlak a ruat thin ang.
Conductor term chu zaipawl term zulzuia ruat a ni ang a, Committee-in tul a tih chuan term laklawhah pawh Conductor a thlak thei ang.
Committee-in tul a tih chuan term khat aia tam pawh Conductor ngai aruat nawn thei ang.
Committee-in tul a tih chuan Conductor pui turin Assistant Conductor a ruat thei ang.

IX. Uniform
Zaipawl tan ‘uniform’ neih phal sak a ni ang a, memberte’n Director nena sawihovin an duhzawng tur an ngaihtuah ang.
Committee-in Uniform senso atanga a tum tur a bithliah ang a, a bithliah ang chu pawisa in member tin hnenah pek an ni ang. A bak senso chu membert tum tur a ni ang.
Member ten uniform dang (spare) neih tula an hriat chuan remtih sak an ni ang a, senso erawh chu member-te intum tur a ni ang.
Committee-in Uniform senso a tum tur hi term khat atan member pakhat hnenah vawikhat a ni ang a, term laklawha member thar an awm pawhin pek zel a ni ang.

X. Rawngbawl dan chungchang
Zaia rawngbawl dan tur leh kalphung chu a hnuaia mi ang hi a ni ang.

Zaipawlte chu Synod Inkhawmpui, K.T.P. General Conference, P.Y.F. Biennial Conference a zaia rawngbawlna nei thei ngei tura beisei an ni ang.
Mizoram Presbyterian Kohhranho zingah a tam thei ang ber rawngbawlna nei thei tura beisei an ni ang a. Kumkhat chhungin Aizawl khawpui pawnlam Bial thum an tlawh thei ang a, an kalna senso chu Committee-in a ngaihtuah sak thin ang.
Zaipawl term (kum 2) chhung hian Mizoram pawna rawngbawlna vawikhat emaw tal neia zin chhuak tura ngaih an ni a, hei hian P.Y.F., N.E.I.C.C.Y.A. etc. programme a kal pawh a huam thei ang.
Heng zaipawl Official Programme bakah hian Kohhran, Bial leh Branch ten an duh chuan an sawm thei ang a, kalman senso tul dangte chu a sawmtuten an tum sak ang. Zaipawl sawmna chu Committee kaltlanga tih tur a ni ang.
Aizawl khawpui huam chhung Kohhran, Bial leh Branch te sawmna chu a theih ang chiah tihhlawhtlin sak thei tura beisei an ni ang a. Senso pawh a sawmtuten an tum ang. Senso tum sak thei lo tur chu Committee-in tul a tih angin a tum sak thei ang.
Programme hriat lawk loh, Synod leh K.T.P. huap thila zaipawl mamawhna a awm chuan Committee-in a ngaihtuah ang.
Member-te, inkhawmpui leh thil danga Synod, K.T.P. etc. Palai anga an kal chuan Palai dangte dawn ang Allowance an dawng ve ang.
Karkhat chhungin vawikhat tal hla zir tura beisei an ni ang a, an hla zirna senso (thingpui leh a hmeh man, hla ziak siamna man etc. ) te chu Committee tum tur a ni ang.
Member chu a awmna Kohhran zaipawl tih loh zaipawl danga tel lo tura beisei a ni.

XI. Chhiatni thatni chungchang
Member zingah thi an awmin Zaipawl ten a ralna thilpek leh hun an buatsaih thei ang.
Committee member nupui pasal nei an awma, inneihtirtu in rem a tih chuan Zaipawl ten hla an rem thei ang.
Member zingah nupui pasal nei an awm a, inneihtirtu in rem a tih chuan Zaipawl ten hla an rem thei ang.

XI. Kaihhruaina tih danglam dan
A chunga mi te hi Zaipawl dan nghet ni lovin inkaihhruaina tlangpui tura duan a ni a, heta tarlan loh ngaihtuah ngai a awm chu Committee -in thutlukna a siam ang. He inkaihhruaina hi Committee-in tul a tih hunah a ennawn thei ang a. A then emaw a zavai paihin a tidanglam thei ang a, a dang pawh tul a tih chuan a belh thei ang.