Politics thu leh hla leh thil tihten kan ram a luah tam lai hian Isua politics hi sawi ve a tûl hle. Amah ringtu leh zuitu kan nih hlawm avângin kan hruaitu leh Lal berin politics chungchanga a thu sawi leh politics a kalpui dan tawi têin i han thlir thuak teh ang. Isua zirtirnain politics lama awmzia a neih dan sawina Sap tawnga lehkhabu ziah a tam tawh a. Mahse, chungte chu a ziaktuin politics a ngaih dan ziahna an nihna lai a tam zawk mah. Siam that Kohhran, Catholic, Protestant rilru zau leh Evangelical thlir dan dang danga thlirna te an awm. Heta kan han sawi tum ber chu Bible-a kan hmuh Isuan Pathian lalna ram a sawi dan leh duh dan a ni ber.
1. Lalram politics: Isua politics chu lalram politics a ni. Thuthlung Thar Professor Scot Mc Knight-a chuan, “Isua thu sawi zawng zawng hi politics, lalram politics vek an ni,” a lo ti tawp mai a ni (Christian Political Witness:Authentic 2014). Chu chu Pathian Lal ber a nihna, Isua hmanga tlanna hnathawh ringtute chunga rorêlna tiin a sawi theih ang. Chu Lalram chu lo thleng tan tawh, thleng mêk leh lo la thleng zêl tûr (eschatological), kohhran tak (ecclesial), Kristaa innghat (christological) leh nun dan tha (ethical) ram a ni. A lo intanna a hlain a ril hle, “khawvêl siam tirh ata…ram buatsaih,” a ni daih mai (Mt. 25:34). Israel hnam hmangin Pathianin a buatsaih a, chu chu lo thleng tawh a nihna chu a ni.Chu ram chu Isua Kristaah a lo thleng mêk a, a thlen famkimna tur lam panin a thang zêl a, a famkim hun chu lo la thleng tur a ni. A kohhran êm êm dan chu Israel hnamah intanin Thuthlung Tharah Isua Krista rinna leh amaha nung kohhranteah a lo thleng mêk a ni. Chu chu Isuan a rawn tih lan, a din, ro a rel sakte an ni a. A hnêna inpe apiangte chu chu lalram mite chu an ni. Krista chu innghahna lungphum a ni. Nun tha ram, Krista zirtirna awih leh zuia nunna ram a ni. Chu lalram politics-ah chuan Kohhran hi a laipui ber a. Isua hi a innghahna a ni a, Isua pawnah kohhran a awm thei lo. Kohhran hi Isua tlante awm khawm an ni a, Isua lalna ram chu an ni. A nun dan phungte chu khawvêl nun dan phung nêna lak pawlh chi a ni lo. Isua lalna hnuaia inpawl hona leh a zirtir nih hona a ni.
2. Lalram zepui: Chu lalram zepui ber, Isua politics kalphung chu hmangaihna a ni. Juda lehkhaziaktu pakhatin a zawhna a chhannaah khan Isuan thupêk ropui ber, a lalram dan hnukpui a sawi chhuak a. Chu chu, Lalpa i Pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hmangaih tur a ni. A dawttu a sawi leh a, Nangmah i inhmangaih angin i vengte (mihringpuite) pawh i hmangaih tur a ni, tiin (Mk.12:28-31 a paraphrase hi keima tih). Heng thupêk pahnihte hian dan leh zawlneite thu zawng zawng a khai khawm vek a ni (Mt.7:12). Chu chu Isua politics kalphung kawngpui chu a ni. Hmangaihna awmzia chu Isuan a nun, hna thawh leh thihnain a tar lang a. Pathian chu hmangaihna a nihzia a rawn tilang. Hmangaihna hre thiam tur chuan Pathianin a thil siam leh a mite a hmangaih a, an hnênah a cheng a, an tân a awm a, a mite chu amah ang turin a siam thar zel tih hriat thiam hmasak a ngai a ni. Hmangaihna avângin a mite tân thuthlung a siam a, thianghlimnaah te, felnaah te, hmangaihnaah te, finnaah te leh diknaah te thang lian zel turin a siam thar zêl thin. Chu chu Isua politics kal dan chu a ni. Chu Pathian hmangaihna avâng chuan he khawvêl lalram nêna tehkhin chuan lalram linglet a ni a, hmelmate hneha lak dan tur chu hmangaihnain a ni ta daih zawk a ni. Chutianga mihringpuite enna chuan zalenna, dikna leh muanna te a rah chhuak thin a ni.
3. Thiltihtheihna (power) politics: Isuan leia rawng a bawl tantirha a rawngbâwl dan tur Isaia 61:1-2 thu a lak chhuah chu, Riangvaite hnêna Chanchin Tha hril, salte hnêna chhuahna thu leh mitdelte hnêna mitvar lehna thu sawi te, tihduhdah tuarte chhuahtirna leh Lalpa lungawi kum thu sawi te a ni. Chu hna thawh chu a politics a ni a, chumi ti tur chuan Lalpa Thlarau chu a chunga a awm thu a sawi (Lk.4:18-19). Hei hi Isua politics a a manifesto chu a ni. Chu chu Lalpa Thlarau thiltihtheihna chuan a han thawk ta tak tak a. Ramhuaite a hnawt chhuak a, damlote a tidam a, mitdel mitte a tivar a, kebai leh zengte kein a kaltir a, mitthite a kai tho a. Chu thiltihtheihna chu Isua lalram thiltihtheihna a ni a, chu ram chu a lo thleng ta tih entirna a ni (Mt. 12:28; Lk. 11:20).Chutianga thiltihtheihna ropui chuan amah ngei pawh mitthi zing ata a kai tho leh a ni. Hetianga Pathian thiltih theihna mihringte tih that nana hman hi Isua lalram awm dan tur dik tak a ni. Sual phuar phelh te, dik lohna avanga tuar chhan chhuah te, Setana awp beh tihzalen te chu Isua lalram zia, Isua politics kalphung a ni. Hetianga lalram thawhna hmanruaa a rawn hman te chu ranthleng tlawm tak leh thing anchhedawng an ni. Isua politics chu mahni inphat, khenbeh nih leh mi dangte tâna inhlan zawh vêkna avânga Pathian hnên atanga chawimawina dawn a ni (Philp.2:5-11).
4. Isuan a politics a kalpui dan: Pa Pathian duh dan leh Pain a hun a tih hun nghakin a kal. Setanan amah chibai a buk chuan khawvêl ram zawng zawng pek a tiam a, mahse Isuan a hnawl thak. Pa Pathian thu ang chauha awm leh Anin hun a tih hunah lo chuan Setana hnên atanga lalram lo hmuh mai kha a duh lo (Mt. 4:8-10;Lk.4:5-8). Pilata hmaa a dina a ram chu he khawvêla mi a nih lohzia a sawi khan tharum thawha mihring chakna mai hmanna ram a ni lo tih a sawina niin a lang (Jn 18:36). A lalram chu hotuin chhiahhlawh anga a hote rawng a bawlsakna a nihzia tihlan nan a zirtirte ke a sil. Rawngbâwlsaka awmna ni lovin mite rawngbâwlsaktu nihna ram, intih lalna ni lovin mi chhiahhlawha tan peihna ram a ni (Mk.10:42-45;Mt.23:8-12). Isua politics-a thil lang pakhat leh chu roreltu sual ngaih theih lohna a ni. Herod Antipas-a chuan Isua a lo lar khan a lo huphurh hle ni tur a ni (Jn.6:15), a unaupa nupui chhuhsaktu a ni a, kha kha Baptistu Johanan a sawisel khan a lu a tansak a, chutiang bawk chuan Isua khan a thil tih dik lo tak kha a haw hlê niin a ring pawh a ni thei, Isua kha tihhlum a duh ta êm êm a. Chumi thu Pharisaiten Isua an han hrilh chuan, Chu sihal hnênah chuan he thu hi va sawi rawh u… a ti (Lk.13:31-32). Roreltu dik lo tlawn lungawi a tum lo. Huai takin a dodalin a sawisel. Chu chuan a thihna a thlentir ta tiin a sawi theih. Temple chhiah leh Kaisara hnêna chhiah pek thua Juda hotuten a awhna tura thang an kam khan fing takin a chhang. Pathian thil leh Kaisara thil chu thliar fel thiam mai tur tih a zirtîr (Mk. 12:13-17). Pathian Biak In thianghlim hman dan dik lo leh sakhuana mahni sumdawn nân leh intih hausak nâna hman dik lohzia chu tha thawh meuhin a protest. Temple vela Puithiam Lalber super-market an lo din chu a haw hle. Englo zuartute leh leitute a hnawt chhuak, tangka thlengtu ho dawhkan te, thuro zuar ho thutphahte a nam thlu, bungrua ken tlang a phal lo, hruihruala vuain an ran zawrh laite chu a hnawt chhuak, an tangkate a leih bua, an dawhkante a nam thluksak (Mt.21:12-13;Mk.11:15-17;Lk.19:45-46; Jn.2:13-16). Helai thute hian Isua politics khelh dan a tar lang. Sakhuana kâwra hmanga mahni hlawkna tur zawn leh Pathian biakna hmun thianghlim mi retheite rah beh nâna hman te chu tha thawh meuhin a dodal. Hei hi tharum thawh Isuan a phal tihna lam aiin, Pathian duh loh zawng laka thinrimna thianghlim (holy anger) ni zawkin a lang. Sual do kawngah hian tharum ni lovin tha thawh a ngaih chang a awm tih zirtirna a ni thei.
Tlangkawmna : Kan Mizoram, Pathianin min pêk, India ram state pakhat ni veah hian engtin nge politics hi kan kalpui zel dawn? Lal Isua politics ngaihtuah dan leh tih dan entawn tur tha tak kan nei a, chumi aia tute emaw tih dan tha lo leh Kristian lo tak takte kan la lut hnem ta lutuk em? Kan ram Krista kan pe tih te, Kan ram kan hnam min hruaian, Nang chauh kan thlang a che tihte kan sak fo lai hian kan thinlung leh politics-a kan kal danah te hian hengte hi kan ti tak tak em? I ram lo thleng rawh se tih tawngtaina phei hi chu kan sawi zing hle mai. Kan political party-te leh sawrkar kal danah te hian Lal Isua politics zia hi tam deuh deuh se a va duhawm dawn ve. India ram danpui chhunga sakhaw zalenna kan neih chhungah hian Lal Isua leh Pathian hming hi tawngkaa kan lam tam ang ngei hian kan rorelna leh politics kan kalpuinaah hian a duh dan angin kal nasa ila. Chu chuan Mizoram nuam, muanna leh hlimna ram, Pathian ram chu a thlentir ngei ang. Chutiang kan lo nih zel chuan India rama state dangte tan entawntlak kan ni ang a, ram development thil leh a dangte chuan an rawn zui mai ang. A theih chin chinah kan rama roreltu apiangte hian Isua politics kalphung ang hi zui fo sela, Thuthlung Thar, Isua leh a zuituten min zirtirna kawngpui hi pensan lo sela a va tha dawn em!
Miten min lo sawi dan hlaphuah thiam leh thu sawitute, mi fing leh zawlneiten, danin a phut avang mai ni lova hmangaihnain a chawh thawh avânga mi tinin thil dik leh tha an tih thinna ram nuam chu an lo suangtuah thin a, chumi ram nuam thleng teuh ber chu Lushai ho hi an ni an lo tih ang kha kan tawng leh thei mah na.(Lorrain of the Lushais, by Rev. David Kyles,1944).
Source : Agape - August, 2023