Zanin (Oct. 27, 2023) khan Synod Worship Committee buatsaih Residential Choir Conductors’ Training vawi 27-na chu Pi Zaii Hall, Synod Conference Centre-ah kharna hun hman a ni.

Training kharna inkhawm hi Rev. Dr. K. Lallawmzuala, Executive Secretary i/c Worship in a kaihruai a, Pu Lalchhungliana, Co-ordinator, Synod Worship hnen atangin report ngaihthlak a ni a, Synod Moderator Rev. Dr. C. Chawnghminglianan thusawiin training chhuakte hnenah certificate a hlan a ni. Praise On 2022-a pathumna Nl. R. Lalnuntluangi, Laipuitlangin Pathian fakna hla a sa a, trainee aiawh thusawi ngaihthlak a ni a. Senior Music Instructor Pu H. Lalrinmawia'n lawmthu sawina hun a hman zawhah Synod Moderator Rev. Dr. C. Chawnghminglianan malsawmnain inkhawm a tin a ni.

Tun tum Zaipawl Conductor training-ah hian mi 31 (Aizawl khawpui chhung atangin mi 4 leh Aizawl pawn atangin mi 27) an rawn tel thei a, Conductor 7, Asst. Conductor 13 leh Conductor ni lem lo 11 an ni. Training chhung hian zaipawl rawngbawlna tana thil pawimawh hrang hrang - Musical Terms & Signs, Conducting, Harmonisation, Scales leh thil chi hrang hrang te Worship Department-a Music Instructor ten riahchilhin an zirtir thin a ni. 

Synod Worship Committee chuan Zaipawl Conductor Training hi kum 1995 atang khan kum tinin a buatsaih thin a. Zaipawl Conductor Training-a zir chhuak hi mi 1064 an awm tawh a, kumina trainee mi 31 nen chuan mi 1095 an tling ta a ni.

For more pics Click Here