Mizoram Synod chuan Manipur buai avanga in leh lo chante tan thawmhnaw leh mutbu thahnem tak chu November 1, 2023 (Nilaini) zan khan truck pathum hmangin a thawn.

Manipur a buai avanga in leh lo chante awmna tur in sak nan Synod hian cheng nuai 65 chu July thla khan a lo pe tawh a. Heng in te hi sak zawh chhoh mek a ni a, an luah tan mek a. A luahtute hi an in leh lo halsak leh hak lai nen chauha tlanchhiate an ni a. Heng mite tan hian Synod Puipa meeting chuan Aizawl khawpui chhunga Pastor Bial 5 - Mission Veng, Mission Vengthlang, Venghnuai, Kulikawn leh Tlangnuam Bialte hnena thawmhnaw hak tur chi leh mutbu lam chi an theih ang ang thawh khawm turin a ngen a. Heng Bialte hian an rawn theh khawm bakah, pawl leh mimal thahnem ngaiten an dah khawm bawk a. Heng thuamhnaw leh mutbu an rawn theh khawmte hi November 1, 2023 (Nilaini) zan khan Manipur panin phurh chhuah a ni a, Rev. Z. John Malsawma Colney, Synod Partnership Secretary-in bungraw phur motor-te hi a vai liam a ni.

In sak thara awmte bungbel tur pawh Synod hian ngaihtuahsakin, chhungkaw 250 tan bungbel - chaw ei thleng, dekchi, plate, no, fian leh bungbel tul zualte a la pe leh dawn a, heng bungbelte hi tunkar hian Manipur thlenpui hman tum a ni bawk.

For more Pics Click Here