November 22, 2023 khan Synod Executive Committee chu JM Lloyd Hall, Synod Office-ah a vawi 304 nan an thu khawm a. Meeting hi Rev. Dr. C. Chawnghmingliana, Moderator-in a kaihruai a ni.
He thut khawmah hian Upa Inneihna kawltu ruat chungchangte, MKHC term thara Presbyterian Kohhran aiawh tur leh 2023 General Meeting palai tur ruatte, Doctor Specialist zir zote dinhmun tihchian chungchangte, Additional Budget dah belh chungchangte, Research Base-a Kohhran hmathlir chungchangte an ngaihtuah a ni.
November 23, 2023-ah Executive Committee vawi 305-na an thu zawm lehnghal a. He thut khawm hi Budget Session a ni a. Synod Department hrang hrang budget ruahmanna, Synod Finance Committee-in a pawm tawh chu ngaihtuah ho a ni. SEC-in Budget hi a pawm fel hnuah Synod Inkhawmpuia ngaihtuah tura chhawp chhuah a ni ang.
