Vawiin (Dec. 14, 2023) chawhma dar 11:00 khan Synod Office Devotion Hall-ah Mizoram Kohhran Hruaitute Committee (MKHC) General Meeting vawi 29-na neih a ni.
Meeting hi Rev. Dr. C. Chawnghmingliana, Chairman, MKHC-in a kaihruai a, Recording Secretary-te chu Upa Lalnilawma Colney, Jt. Secretary leh Rev. Lallawmsanga, Jt. Secretary te an ni.
Rev. Hanania Lalringngheta, EFCI-in hunserh a hman zawhin National Tobacco Control Programme-in an dil angin hun pek an ni a. NTCP State Nodal Officer, Dr. H. Lianthangpuian thu tawi a sawi zawhah Pu R. Lalremruata, State Consultant, NTCP-in Presentation a buatsaih chu en ho a ni. Hemi hnu hian inhmelhriattirna leh palai inchhiarna neih zui a ni.
Secretary Report leh Financial Report ngaihthlak a nih hnuin rorel zui a ni a, MKHC Hruaitu (Office Bearer) tharte pawmna leh Executive Member tharte pawmna neih a ni a. Tul dangte ngaihtuah ho a ni bawk. Rev. Zion Varmawia Fanchun, Vice Chairman, MKHC-in lawm thu a sawi a, Rev. C. Zorammawia, Senior Executive Secretary, Mizoram Presbyterian Kohhranin tawngtaiin hun a khar a ni.