January 10, 2024 (Nilaini) chawhnu dar 2:00 khan Falkawna Synod Khualbuk chu Moderator Rev. R. Vanlalnghaka'n Pathian hnenah hlanin a hawng.
Hawnna inkhawm hi Rev. C. Zorammawia, Senior Executive Secretary i/c Synod Trust Committee-in a kaihruai a, Upa Thangliankhuma, Assistant Engineer, Synod Office-in technical report a pe a, Synod Moderator-in Pathian hnenah hlanin khualbuk hi a hawng a ni. Rev. P.C. Pachhunga, Finance Officer-in lawmthu sawiin Rev. H. Laltlanthanga, Statistician-in programme a khar a ni.
Falkawna sawrkar damdawi in (Zoram Medical College) pantu an ṭhathnem zel avangin OM (14.08.2019) chuan Falkawna Synod ramah hian khualbuk leh Chaplain quarters sak ṭha tiin, Synod Trust Committee bawhzui turin a dah a. Synod Trust Committee chuan a policy chu SEC-ah a thlen a. |awi Presbytery aṭanga “Falkawna khualbuk sak rawtna” nen sawi kawpin a Policy chu Synod-ah thlen leh a ni a, Synod 2019 chuan ṭha tiin Synod Trust Committee-in Plan & Estimate a siam ta a ni.
Khualbuk leh Chaplain Quarters hi ground floor-ah a dung feet 66 leh a vang feet 50 a ni a. Mizo pa chhiara chhawng 5-a sak niin, ban 24 phun a ni a, sak zawm leh theih tura ruahman a ni. Building sak hna hi Upa C.T. Mawia, Kolasib Diakkawn (CZS Construction Company) ten an thawk a ni.