OBITUARY : REV. ALFRED LALRUATFELA (37)
February 12, 2024 | OBITUARY
Rev. Alfred Lalruatfela (kum 37), Synod Social Front Department-a thawktu chu tukin (Feb. 12, 2024) zing dar 2:55 khan Cancer avangin a thi a, vawiin chawhnu dar 1:00 hian Synod Moderator Rev. R. Vanlalnghaka’n Mission Veng Kohhran Biak Inah a vui ang.
Rev. Alfred Lalruatfela hi Pu R. Lalrinawma leh Pi F. Dengremi (L) te fa pathum zinga a naupang ber niin Biateah Nov. 25, 1987 khan a lo piang a. Pianpui unau pahnih - hmeichhia pakhat leh mipa pakhat a nei.
Kum 2017 November ni 16 khan Lalruatkimi d/o Lalnuntluanga Zonuam nen Biate Kohhranah an innei a, fanu pahnih leh fapa pakhat an nei.
An fate:
1. Lalpekhlui Ralte, kum 6
2. Vannunpuii Ralte, kum 3
3. Samuel R.Lalfakzuala, kum 2
Rawngbawlna lam
Rev. Alfred Lalruatfela hian Biateah Class-12 thleng a kal a, kum 2010-ah Allahabad atangin B.Th (Bachelor of Theology) a zo a, kum 2012 khan Serampore atangin BD (Bachelor of Divinity) a zo leh a, kum 2014-ah ATC atangin M.Th. (Master of Theology) Old Testament a zo leh bawk.
Kum 2014-a Mission Vengthlang Biak Ina Synod Inkhawmpui chuan Pro. Pastor atan a la a, kum 2015 khan Saihaah dah a ni. Saihaah kum 1 a Pro Pastor hnu hian Kolkata-ah Pro. Pastor-in sawn a ni a, Kolkata-a Pro. Pastor a thawh pah hian Bishop College, Kolkata-ah Lecturer (Old Testament) hna a thawk nghal bawk. Kum 2016 Synod Inkhawmpui Durtlang Biak Ina neihah nemngheh a ni a. Nemngheh a nih hnuah Sakawrdai Bial a vawng a. Pastor rawngbawl hna a thawh chhunga a awmna leh chanvo chelh tawhte:
1. 2015 : Pro Pastor Saiha Bial
2. 2016-2017 : Pro Pastor Kolkata & Asst Professor Bishop College,Kolkata
3. 2018-2022 : Sakawrdai Bial
4. 2022-2023 : Synod Revival Dept
5. 2023-2024 : Synod Social Front Dept
Bial vawnga a awm chhung hian Sakawrdai Bial Chairman te, Hmarphei Presbytery Moderator te, Synod Executive Committee Member (2019-2021) te leh Synod Sunday School Committee member (2022) te a lo ni tawh bawk.
A mizia
Rev. Alfred Lalruatfela hi pa kawm nuam leh rual pawl thiam tak a ni a, fiamthu duh tak leh thian ngaina mi tak a ni. Lehkhathiam thei tak ni lo mah se, mi taima leh zir tlut tlut mai chi a ni thung. Thlarau mi, tawngtai uar em em a ni bawk a; B.Th. zir tura a kal dâwn pawh hian Biak Inah a thian pakhat nen an tawngtai tlaivar a ni awm e. Thlalak a thiam a, Music a tui a, Guitar a thiam viau bawk. Hla phuah pawh a tui a, a damloh hnu Aug. 17, 2023 khan ‘A la pangngai reng’ tih hla a phuah a, he hla hi One In Christ ten sain, music video pawh an siam nghe nghe.
A nat dan
Kum 2022 khan a lei a ulcer a, thla hnih vel lai hnuah a dam theih loh avangin June 16, 2022 khan Synod Hospital Durtlangah a entir a, biopsy lak a nih hnuah June 21, 2022 khan lei cancer a ni tih hriat a ni a. Inenkawl turin June 25, 2022 khan Vellore an pan a, July 6, 2022 ah zai niin, hemi hnu hian Aizawl lamah an lo haw a. Aizawlah hian Chemo a la chhunzawm a, amah pawh a tha chak a, rawngbawlna pawh a chhunzawm leh thei hial.
Kum 2022 hian Sakawrdai Bial a vawn hun a lo tawp chiah a, cancer natna nei a nih bawk avangin Synod Office lamah sawn a ni a. Synod Office-a a awm chhung hian hmun hrang hrangah thusawi tura sawmna a dawng reng bawk.
A natna pawh a ziaawm chho zela ngaih a nih laiin, June 24, 2023 khan a nghâwngah bâwk a awm thar leh avangin Vellore lamah a kal leh a. PET Scan leh Biopsy te a tih hnuah a chuapah cancer hi hmuh leh a ni a, stage 4 lai a lo ni hman tawh a, in lama inenkawl chungin Mizoram State Cancer Institute, Zemabawkah Chemo te a lak chhunzawm a ni.
October 2023 khan a hahni atangin thi a pût a, City Hospital-ah kalpui a nih hnuah Durtlang Hospital-ah admit a ni a. January 9, 2024 khan Apollo Hospital, Kolkata panpui niin, a hahni leh lung (heart) ah te cancer a awm a ni tih hriat chhuah a ni leh a. A dinhmun a that loh avangin HDU-ah dah luh a ni a. A hniam lehzual tak deuh avangin January 22 khan ICU-ah dah luh leh a ni a, Ventilator nen enkawl a ni.
A cancer avanga a lei vûng avangin thâwk a harsat a, Ventilator hmang pawha enkawl hleih theih a nih tak loh avangin a thâwkna atan a hrawk verhsak (tracheostomy) a ni a. Hemi hnu hian ziaawm lam a pan deuh a.
February 1, 2024 khan Apollo Hospital, Kolkata atangin Air Ambulance hmangin rawn phurh chhoh a ni a, Synod Hospital, Durtlang ICU-ah dah luh nghal a ni a. Doctor leh nurse ten theihtawp chhuaha an enkawl laiin February 12, 2024 zing dar 2:35 khan a rawngbawlsak Lalpa hnenah, nat leh hrehawm awm tawh lohnaah a lo chawl ta a ni.
VUINA PROGRAMME
A hmun : Mission Veng Kohhran Biak In
A hun : Feb. 12, 2024 chawhnu dar 1:00
Vuitu : Rev. R. Vanlalnghaka, Synod Moderator
Chanchin sawi : Rev. PB Mankima, Synod Secretary
Zaipawl : Mission Veng Kohhran Zaipawl
Thlamuanna thuchah : Rev. R. Vanlalnghaka, Synod Moderator
Tawngtaisaktu : Rev. Dr. K. Lallawmzuala, Synod Executive Secretary
Zaipawl : Mission Veng Pastor Bial Zaipawl
Hla sak ho : ‘Pathian âng chhûng thianghlimah’ KHB NO. 496
Malsawmna : Rev. PC Pachhunga, Synod Finance Officer
Thlanmual
Hun hmangtu : Rev. Lalchhuanawma, Pastor i/c Zonuam Pastor Bial
